काठमाडौं – राजावादीको आन्दोलनलगत्तै संघीय राजधानी काठमाडौंले बुधबारदेखि शिक्षकहरूको आन्दोलनको सामना गर्नुपर्ने भएको छ । आफूले राखेका माग सुनुवाइ नभएको भन्दै शिक्षकहरू पुनः आन्दोलनमा उत्रिने भएका हुन् । माध्यमिक शिक्षा परीक्षाका कारण शिक्षकहरूको आन्दोलन रोकिएको थियो । तर मंगलबारदेखि एसइइ परीक्षा सकिएलगत्तै नेपाल शिक्षक महासंघको नेतृत्वमा भोलिदेखि देशभरका सामुदायिक विद्यालयमा कार्यरत शिक्षकहरु आन्दोलनमा उत्रिने भएका छन् ।
आन्दोलनको नेतृत्व गरिरहेको नेपाल शिक्षक महासंघले मंगलबार पत्रकार सम्मेलन गर्दै अनिश्चितकालीन आन्दोलनका थाल्ने जानकारी दिएको हो । २० चैतदेखि सुरु हुने आन्दोलन पालिका, जिल्ला र प्रदेश तहमा समेत हुनेछ । मुख्य आन्दोलन काठमाडौं केन्द्रित रहेको महासंघका अध्यक्ष लक्ष्मीकिशोर सुवेदीले जानकारी दिए ।
यसअघि शिक्षकहरुले २४ फागुनमा माइतीघर क्षेत्रमा जुलुस र धर्ना दिएका थिए । विभिन्न पार्टी कार्यालयमा समेत धर्ना दिइसकेपछि अब सडक तताउने गरी आन्दोलनका कार्यक्रम तय गरिएको सुवेदीको भनाइ छ । ‘हामीसँगका मागमा सरकार प्रतिवद्ध छैन, विद्यालय शिक्षा ऐनलाई बेवास्ता गरिरहेको छ, सरकारले चाह्यो भने त्यो ऐन छिटो आउन सक्छ, तर सरकारले चासो नदिएर हो,’ उनले भने, ‘हाम्रो मुख्य माग भनेको विगतमा भएका सबै सहमति सम्बोधन हुनेगरी गुणस्तरीय विद्यालय शिक्षा, विद्यार्थी र शिक्षक कर्मचारी मैत्री अग्रगामी विद्यालय शिक्षा ऐन जारी होस् भन्ने हो, दुई चार दिनमा अघि बढ्ने विद्यालय विधेयक सरकारले वास्तै गरेको छैन ।’
सुवेदीका अनुसार सरकारले यसअघि शिक्षकहरुसँग सम्झौता गरेको थियो, तर ती सम्झौताको अवस्थाबारे शिक्षकहरुलाई नै थाहा छैन । अहिले सबैजसो विद्यालयमा पठनपाठन नभएको र नयाँ शैक्षिक सत्र पनि सुरु नभएकोले शिक्षकहरु काठमाडौं केन्द्रित आन्दालनमा लागेका हुन् । भोलिदेखि सुरु हुने आन्दोलन अनिश्चितकालीन रहेको महासंघले जनाएको छ । करिब ५० हजार शिक्षक बुधबार दिउँसो १ बजे माइतीघर क्षेत्रमा आन्दोलनमा उत्रिने छन् ।
प्रतिक्रिया