काठमाडौं । नेपालले म्यान्मारका भूकम्पपीडितको उद्धार, राहत र घाइतेको उपचारका लागि चिकित्सकसहितको टोली पठाएको छ । म्यानमारमा हालै गएको विनाशकारी भूकम्पका कारण भएको व्यापक धनजनको क्षतिपछि नेपाल सरकारको निर्णयबमोजिम मेडिकल राहत लिएर नेपाली सेनाको टोली बुधबार म्यानमार प्रस्थान गरेको छ ।
प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, चारजना बन्दोबस्ती सहायता टिम र ६ जना चालक दलका सदस्यसहित कुल २२ सदस्यीय टोली नेपाली सेनाको सिएन २३५ सिएएसए विमान लिएर म्यानमार प्रस्थान गरेको हो । विभिन्न प्रकृतिका आवश्यक औषधि एवं उपकरणसहित गएको टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू संलग्न छन् ।
टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिई सेवा गर्ने सैनिक जनसम्पर्क तथा सूचना निर्देशनालयले जनाएको छ। चैत १५ गते म्यानमार गएको ७.६ रेक्टर स्केलको भूकम्पमा परी हालसम्म करिब तीन हजारको मृत्यु भएको छ । हजारौं घाइते भएका छन् । अर्बौको धनजनको क्षति भएको त्यहाँका अधिकारीहरूले बताएका छन् ।
प्रतिक्रिया