काठमाडौं – थाइल्याण्डको औपचारिक भ्रमणमा रहेका प्रधानमन्त्री केपी ओली र भारतीय समकक्षी नरेन्द्र मोदीबीच भेटवार्ता हुने तय भएको छ । तर भारतीय पक्षले अहिलेसम्म औपचारिकता दिइसकेको भने छैन । बैंककमा रहेका नेपाली अधिकारीहरूका अनुसार शुक्रबार स्थानीय समयअनुसार दिउँसो ४ बजे ओली र मोदीबी आधा घण्टा भेटवार्ता गर्ने कार्यक्रम तय भएको छ ।
नेपाली अधिकारीहरूले बैंककमा ओली र मोदीबीच भेटवार्ता हुने आशा गरेका छन् । ओलीको लामो समयदेखि प्रतीक्षा गरिएको भारतको औपचारिक द्विपक्षीय भ्रमणको लागि यो भेटवार्ताले मार्गप्रशस्त गर्ने विश्वास पनि अधिकारीहरूले गरेका छन् । ओली प्रधानमन्त्री भएपछि न त उनको भारत भ्रमण सुनिश्चित भएको छ, न त भारतीय प्रधानमन्त्रीको नेपाल भ्रमण नै तय भएको छ । गत भदौमा भारतीय प्रधानमन्त्री मोदीसँगको भेटमा परराष्ट्रमन्त्री आरजु राणा देउवाले भारतीय प्रधानमन्त्रीलाई नेपाल भ्रमणको निम्तो दिएकी थिइन् । तर ओलीको भारत भ्रमण र मोदीको नेपाल भ्रमण दुवै भएको छैन ।
प्रधानमन्त्री ओलीले शिखर सम्मेलनको क्रममा अन्य बिमस्टेक नेताहरूसँग पनि साइडलाइन भेटघाट गर्नेछन् । तर भारतीय प्रधानमन्त्री मोदीसँगको भेट बहुप्रतीक्षित मानिएको छ । गत असारमा पदभार ग्रहण गरेपछि प्रधानमन्त्री ओली भारतको औपचारिक भ्रमणको खोजीमा छन् ।
बैंककमा मोदीसँगको उनको भेट बहुपक्षीय मञ्चमा उनीहरूबबीचको दोस्रो भेट हुनेछ । दुई प्रधामनन्त्रीले यसअघि गत सेप्टेम्बरमा न्युयोर्कमा राष्ट्रसंघीय ७९औं महासभाको क्रममा साइडलाइन भेटेवार्ता गरेका थिए । त्यसयता उनीहरूबीच फोन संवाद र भेटवार्ता भएको छैन । छैटौं बिमस्टेक शिखर सम्मेलनमा सहभागी हुन ओली बैंककमा छन् ।
थाइल्याण्डको पहिलो औपचारिक भ्रमण र शिखर सम्मेलनमा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री ओली मंगलबार बैंकक प्रस्थान गरेका हुन् । दुई देशबीच कूटनीतिक सम्बन्ध स्थापना भएको ६६ वर्षमा नेपाली प्रधानमन्त्रीको थाइल्याण्डको यो पहिलो औपचारिक भ्रमण हो ।
ओली र थाइल्यान्डकी समकक्षीबीच बुधबार बिहान भेटवार्ता भएको छ । दुई सरकारबीच सम्झौता र नेपाल र थाइल्याण्डका निजी क्षेत्रहरूबीच ६ वटा समझदारीपत्रमा हस्ताक्षर हुँदैछ । यी सम्झौताहरूले संस्कृति, पर्यटन र कृषि लगायतका क्षेत्रहरूलाई समेट्नेछन् ।
प्रतिक्रिया