शास्त्रीको निधनमा कांग्रेसले तीन दिन शोक मनाउने, देउवाले ओढाए पार्टीको झन्डा

काठमाडौं – नेपाली कांग्रेसले पूर्वमन्त्री एवं समाजवादी चिन्तक ढुण्डिराज शास्त्रीको निधनप्रति दुःख व्यक्त गर्दै तीन दिन शोक मनाउने निर्णय गरेको छ।कांग्रेसको बुधबार बसेको आकस्मिक केन्द्रीय कार्यसमिति बैठकले उनको निधनमा शोक प्रस्ताव पारित गर्दै यही असार ४, ५ र ६ गते तीनदिनसम्म पार्टीको केन्द्रीय कार्यालय, प्रदेश कार्यालय र जिल्ला कार्यालयमा झण्डा आधा झुकाउने निर्णय गरेको हो ।

बैठकले असार ५ गते केन्द्र, प्रदेश र जिल्लाका सबै कार्यालय बन्द गर्ने, स्वर्गारोहणको १३औँ दिनसम्म केन्द्र, प्रदेश र जिल्ला कार्यालयहरूमा शोक पुस्तिका राख्ने र स्वर्गारोहणको १३औँ दिनमा सम्बन्धित जिल्लामा शोकसभा आयोजना गर्ने निर्णय गरेको पार्टीका मुख्यसचिव कृष्णप्रसाद पौडेलले बताए। शास्त्रीको काठमाडौँ मेडिकल कलेजमा उपचारका क्रममा ८९ वर्षको उमेरमा असार २ गते निधन भएको हो। उनको पार्थीव शरीर श्रद्धाञ्जलीका लागि अहिले कांग्रेस पार्टी कार्यालय सानेपामा राखिएको छ । पार्टी सभापति शेरबहादुर देउवाले शास्त्रीको पार्थीव शरीरमा पार्टीको झन्डा ओढाएका छन् । उनको आजै पशुपतिमा अन्तिम संस्कार हुने भएको छ ।

विद्यार्थी जीवनदेखि कांग्रेसको राजनीतिमा सक्रिय रहँदै आएका स्व.शास्त्रीले प्रजातन्त्र पुनःस्थापनाको संघर्ष र आन्दोलनका क्रममा जेल जीवन र लामो समय भारत प्रवासमा जीवन बिताएका थिए। स्व.शास्त्री जननायक बिपी कोइरालाका अनुयायी, समाजवादी चिन्तक र प्रजातान्त्रिक समाजवादका व्याख्यातासमेत थिए ।