काठमाडौँ l बहुविवाहलाई कानुनी मान्यता दिने तयारी गरिएको भन्दै महिला अधिकारकर्मी बिनु यादवले काठमाडौँको माइतीघर मण्डलामा आमरण अनशन सुरु गरेकी छन्।
सेतो सारीमा सजिएर शान्तिपूर्ण ढंगमा विरोध गर्दै आन्दोलित बनेकी यादवले सरकारलाई स्पष्ट सन्देश दिएकी छन् —
“बहुविवाहजस्तो लैङ्गिक हिंसालाई कानुनी वैधता दिन खोज्नु महिलामाथिको अपमान हो।”
उनी आफ्नै प्रेमीबाट बलात्कृत भएकी थिइन् भन्ने आरोपसहित सात वर्षदेखि न्याय माग्दै आएकी हुन्। न्याय पाउन नसकेको पीडामा पनि यो प्रस्ताव थपिएपछि उनी आन्दोलित बनेकी हुन्।
उनको माग छ:
- बहुविवाहलाई कानुनी वैधता दिने कुनै पनि मस्यौदा तुरुन्त फिर्ता गरियोस्।
- पीडित महिलाको आवाज नसुनिनु अन्याय हो; तत्काल न्याय प्रक्रिया अघि बढाइयोस्।
हालको कानुनअनुसार, नेपालमा बहुविवाह गैरकानुनी छ र यसमा संलग्न व्यक्तिलाई कैद तथा जरिवानाको सजाय हुने व्यवस्था छ।
सरकारले यदि यस्तो मस्यौदा अगाडि बढाउने हो भने त्यसले लैङ्गिक समानता, संविधान र मानव अधिकारको मर्ममाथि प्रहार गर्नेछ भन्ने बिनु यादवको चेतावनी छ।
प्रतिक्रिया