अर्थमन्त्री पौडेलः सरकार धूलो र हिलोरहित सडक निर्माणमा प्रतिबद्ध

काठमाडौं – अर्थमन्त्री विष्णुप्रसाद पौडेलले सरकारले देशभरका सडक पूर्वाधारलाई धूलो र हिलोरहित बनाउन लक्ष्यसहित काम गरिरहेको बताएका छन्।

‘नाइमा नेपाल मोबिलिटी एक्स्पो’को आज बिहान काठमाडौंमा उद्घाटन गर्दै मन्त्री पौडेलले गुणस्तरीय सडक निर्माणका लागि आधुनिक प्रविधिको प्रयोग गरिने उल्लेख गरे।

“सडक पूर्वाधार कनेक्टिभिटीको पहिलो आवश्यकता हो। त्यसैले यसलाई सरकारले उच्च प्राथमिकतामा राखेको छ,” उनले भने। “गुणस्तरमा सुधार ल्याउन पीसीसी (Plain Cement Concrete) अथवा आरसीसी (Reinforced Cement Concrete) मध्ये जुन मोडल उपयुक्त हुन्छ, त्यसैअनुसार निर्माण अघि बढाइनेछ।”

उनले एक्स्पो जस्ता कार्यक्रमले यातायात, पूर्वाधार र प्रविधिक विकासमा सहयोग पुग्ने विश्वास व्यक्त गरे।