काठमाडौं – लिपुलेक र भारतद्वारा मिचिएको भनिएको पश्चिमी क्षेत्रको भूभागलाई लिएर प्रधानमन्त्री केपी ओलीले पहिलोपटक अन्तर्राष्ट्रियकरण गरेको भन्दै एमाले वृत्तले धन्यवाद अभियान थालेको छ ।
प्रधानमन्त्रीको सचिवालयले ओलीको फेसबुक पेजमा आइतबारै बिहान एउटा पोस्ट गरेको थियो । जसमा ओलीको तस्बिरसहित लेखिएको थियो, ‘जननी जन्मभूमिश्च स्वर्गादपि गरीयसी।।। जय जय नेपाल !’ ओलीको फेसबुक पेजमा चीनबाटै यो क्याप्सनसहितको तस्बिर पोस्ट भएपछि एमाले महासचिव शंकर पोखरेलले सोमबार बिहानै ‘धन्यवाद’ पोस्ट हाले ।
प्रधानमन्त्री ओली, आफ्नो तस्बिर र नेपालको राष्ट्रिय झण्डासहित हालिएको पोस्टले नेपालले लिपुलेकबारे चीनसँग उठाएको कुरालाई इंगित गरेको छ। ओलीले चिनियाँ राष्ट्रपतिसँग लिपुलेक सम्झौताबारे कुरा उठाएको र उक्त भूमिमा नेपालको दावी पेश गरेको कुरामा उनले धन्यवाद पोस्ट गरेका हुन् ।
प्रधानमन्त्री ओलीका मुख्य सल्लाहकार तथा एमाले उपमहासचिव विष्णु रिमालले पनि धन्यवाद पोस्ट गरे । एमाले उपमहासचिव एवं सञ्चार तथा सूचना प्रविधिमन्त्री पृथ्वीसुब्बा गुरुङले यही पोस्ट फेसबुकमा हालेका छन्। उपमहासचिव प्रदीप ज्ञवालीले समेत यही ट्रेन्ड पछ्याएका छन् ।
अध्यक्ष ओलीनिकट यी नेताहरूले फेसबुकमा धन्यवाद पोस्ट गरेसँगै अहिले एमाले कार्यकर्ताहरू त्यही ट्रेन्डलाई पछ्याउन थालेका छन् । एमाले नेता भीमज्वाला राई पनि धन्यवाद पोस्टका लागि अघि सरेका छन् ।
तर उनीहरूको धन्यवाद पोस्टलाई केहीले समर्थन र केहीले विरोध गरेका छन् । सामाजिक सञ्जाल प्रयोगकर्ताले भारतले हडपेको भूमि नै फिर्ता ल्याएको शैलीमा एमाले नेताहरू प्रचारमा उत्रिएको भन्दै आलोचना गरेका छन् । चीनसँग जस्तै भारतसँग पनि कुरा राखेर भूमि फिर्ता ल्याउन पहल गर्नुपर्ने भन्दै उनीहरूले यसलाई उग्रराष्ट्रवाद र सस्तो प्रचारबाजीको पनि संज्ञा दिएका छन् ।
प्रधानमन्त्री ओलीले लिपुलेक पास हुँदै भारत र चीनबीच दुई साताअघि भएको व्यापार सम्झौताप्रति चिनियाँ राष्ट्रपति सि चिनफिङसामु आपत्ति प्रकट गरेको कुरालाई एमालेले राष्ट्रवादी कोणबाट प्रचार गर्न थालेको हो। ओलीले लिपुलेक नेपालको भूभाग भएकाले त्यसलाई व्यापारिक मार्ग बनाउने गरी दुई छिमेकीले गरेको सहमतिलाई आपत्तिजनक भनेका थिए ।
परराष्ट्र सचिव अमृतबहादुर राईले उक्त भेटघाटपछि पत्रकारहरूसँग भिडियो संवादका क्रममा नेपालको भूमिसम्मान र सीमा सार्वभौमिकतामा कुनै सम्झौता हुन नसक्ने कुरा ओलीले राखेको बताए । लिपुलेक मुद्दामा नेपालको प्रष्ट अडान कायम रहेको कुरा नेपाली दूतावासको वक्तव्यमा पनि उल्लेख छ ।
चिनियाँ राष्ट्रपतिले लिपुलेक विवाद भारत र नेपालको भएकाले त्यसमा आफ्नो देश नजोडिने जवाफ दिएका थिए । भारतीय अतिक्रमणमा परेको लिपुलेक, लिम्पियाधुरा र कालापानी क्षेत्रमा ऐतिहासिक दस्तावेज समेतका आधारमा नेपालले आफ्नो दावी गरिरहेको छ । तर यसबारेमा भारतसँग वार्ता हुनै बाँकी छ ।
आइतबार भारतीय प्रधानमन्त्री नरेन्द्र मोदीले चिनियाँ राष्ट्रपति सी जिनपिङसँगको भेटवार्तामा दुई देशका विदेशमन्त्रीले सीमा व्यापारबारे सहमति गरेको भनेर लिपुलेक र कालापानी क्षेत्रबारे दाबी छाडेका छैनन् । यसले प्रधानमन्त्री ओली र मोदीबीच चीनमा भेटवार्ता नहुने आंकलन गरिएको छ ।
प्रतिक्रिया