माधव नेपाल प्रचण्डसँग मिले घनश्यामको अध्यक्षतामा नयाँ पार्टी खुल्ने, यिनले दिनेछन् साथ

काठमाडौं । एकीकृत समाजवादी विभाजनको संघारमा उभिएको छ । जारी केन्द्रीय कमिटी बैठकको दुई तिहाइ बहुमतले माओवादीसँग पार्टी एकता गर्ने अध्यक्ष माधवकुमार नेपालको तयारी छ । यदि यो निर्णय भएमा आजै पार्टी फुट्ने नेताहरूको भनाइ छ । एकीकृत समाजवादीका ११ नेताले माओवादीसँगको एकतामा सामेल नहुने बताइसकेका छन् ।

जसमा सम्मानित नेता झलनाथ खनाल, वरिष्ठ नेता घनेन्द्र बस्नेत, महासचिव घनश्याम भुसाल छन् । यस्तै, स्थायी कमिटी सदस्यहरू विजय पौडेल, जीवनराम श्रेष्ठ र रामकुमार झाँक्री पनि माओवादीसँग एकतामा नजाने भनिसकेका छन् । पोलिटब्युरो सदस्य धर्म निरौला, महेश रेग्मी, लक्ष्मण लम्साल, दामोदर अर्याल र अच्युत घिमिरे पनि एकता प्रक्रियामा नजाने बताइएको छ ।

यो त अहिलेसम्म सार्वजनिक भएका ठूला नेताको नाम हो । स्रोतका अनुसार वामदेव गौतम, भानुभक्त जैसी, किसान श्रेष्ठ, प्रेम आलेलगायत पनि माओवादीमा नजाने भएका छन् । यदि माधव नेपालले बहुमतले पेलेरै प्रचण्डको माओवादीसँग एकताको निर्णय गराएमा आजै घनश्याम भुसालको अध्यक्षतामा अर्को पार्टी गठन हुनेछ । जुन पार्टीको संरक्षकमा झलनाथ खनाल हुनेछन् । एकीकृत समाजवादीमा अहिले माओवादीसँग मिल्ने, एमालेमा जानुपर्ने र नयाँ पार्टी खोल्नुपर्ने गरी तीनथरी विचार बोकेका नेता छन् ।