शुक्रबार भारतमा रिलिज हुन लागिरहेको नेपाली चलचित्र ‘ऊनको स्वीटर’को प्रचार–प्रसारका लागि आयोजित ‘ऊनको स्वीटर साँझ’ बुधबार सिक्किमको राजधानी गान्तोकस्थित महात्मा गान्धी (एमजी) मार्गमा भव्य रूपमा सम्पन्न भयो। कार्यक्रममा हजारौँ दर्शकको उत्साहपूर्ण उपस्थिति रहेर भारतीय भूभागका नेपाली भाषी समुदायमा नेपाली चलचित्रको व्यापक आकर्षण झल्कियो।
कार्यक्रममा नेपालका लोकप्रिय गायक सुजन चापागाईँले फिल्मका गीतहरू प्रस्तुत गर्दै वातावरणलाई झनै रोमाञ्चक बनाए। उनीसँगै अभिनेता विपिन कार्की, अभिनेत्री भावना खपांगी मगर, निर्देशक नवीन चौहान, गीतकार हर्क साउद, संगीत निर्देशक कोविद बज्र, छायांकन निर्देशक चिन्तन राजभन्डारी, कार्यकारी निर्माता मिलन खत्री र सागर बुढाथोकीलगायत टिमका सदस्यहरू सहभागी रहेका थिए।
सिक्किम र दार्जिलिङ क्षेत्रका चर्चित कलाकारहरूले पनि आफ्नो प्रस्तुति दिए। अनमोल गुरुङ, प्रकाश क्षेत्री, सिम्रन गुरुङ, रिको लामा, र्यापर देवा र सोनम ओङ्मु इथेन्पाल कार्यक्रमका आकर्षण बने। साथै, अमृता राईले चलचित्रको चर्चित गीत ‘काफ्ले’मा नृत्य प्रस्तुत गरिन् भने नेपालबाट आएका नर्तक सुरज सिंहजाली मगरले ‘चाइनेजो जिन्दगानी’मा प्रस्तुति दिए।
‘ऊनको स्वीटर’ नोभेम्बर २१ देखि दार्जिलिङ, सिलिगुडी, गान्तोक, कर्स्याङ, कालिम्पोङ, आसाम र दिल्लीका प्रमुख हलहरूमा रिलिज हुँदैछ। यसअघि भारतको सेन्सर बोर्डबाट पास भइसकेको फिल्मलाई एसली प्रोडक्सनले वितरण गर्दैछ। बिहीबार साँझ सिक्किममा विशेष प्रिमियर शो आयोजना गरिएको छ।
निर्देशक नवीन चौहानले नेपालमा जस्तै भारतमा पनि चलचित्रले उल्लेखनीय सफलता पाउने विश्वास व्यक्त गरे। वितरक एसली प्रोडक्सनका प्रमुख एवन राईले यो पहिलो प्रयास सफलताको दिशामा अघि बढेको बताउँदै भारतीय बजारमा नेपाली चलचित्रलाई नियमित रूपमा वितरण गरिने जानकारी दिए।
सोही अवसरमा गायक सुजन चापागाईँले आगामी डिसेम्बर २३ मा गान्तोकमा ‘सुजन चापागाईँ एन्ड द इन्फिनिटी’ ब्यान्डको कन्सर्ट हुने घोषणा गरे।
नेपालमा करिब १२ करोड रुपैयाँभन्दा बढी बक्स अफिस कमाई गर्दै वर्षकै चर्चित फिल्ममध्ये एक बनेको ‘ऊनको स्वीटर’ले यथार्थपरक कथा, बलियो अभिनय र मन छुने सङ्गीतका कारण दर्शक र समीक्षक दुवैबाट प्रशंसा पाएको थियो। भारतमा पनि सोही लोकप्रियता दोहोरिने अपेक्षा गरिएको छ।
प्रतिक्रिया