सशस्त्र प्रहरी प्रमुख अर्याल जाँचबुझ आयोगको कठघरामा, बयान दिँदै

काठमाडौं । सशस्त्र प्रहरी बलका महानिरीक्षक राजु अर्याल न्यायिक जाँचबुझ आयोगको कठघरामा उभिएका छन् । उनी मंगलबार भदौ २३ र २४ को घटनासम्बन्धी छानबिन गर्न गठित जाँचबुझ आयोगमा बयान दिन पुगेका छन् ।

भदौ २३ गतेको जेनजी आन्दोलन, २४ गते उत्पन्न अवस्था, नयाँ बानेश्वरमा भएको सुरक्षा समन्वय अभाव, ती घटनामा सशस्त्र प्रहरीको भूमिकालगायतका विषयमा आयोगले अर्यालसँग बयान लिइरहेको छ । आयोगका संयोजक गौरीबहादुर कार्कीले यसअघि सशस्त्रका डीआईजी र एआईजीसँग बयान लिइसकेका छन् ।

साथै, आयोगले नेपाल प्रहरीका तत्कालीन आईजीपी चन्द्रकुबेर खापुङ, काठमाडौंका प्रमुख जिल्ला अधिकारी छवि रिजाललगायतसँग बयान लिइसकेको छ । आयोगले नेपाली सेनालाई पनि बयान दिन पत्र काटेको थियो । तर जंगी अड्डाले आयोगलाई आफूहरूले नचिन्ने जवाफ दिएको छ ।

आयोगको म्याद सकिँदैछ । हाल प्रतिवेदन लेखनको काम भइरहेको छ । तर अझै पनि तत्कालीन प्रधानमन्त्री केपी ओली र गृहमन्त्री रमेश लेखकसँग भने आयोगले बयान लिन सकेको छैन । आयोगले एक दुई दिनभित्रै बयान दिन बोलाउने तयारी गरेको छ । एमालेले भने ओलीलाई बोलाइए प्रतिकार गर्ने चेतावनी दिइसकेको छ । जसले गर्दा आयोग हच्किएको हो ।