काठमाडौं । एमाले अध्यक्ष केपी ओलीका दाहिने हात मानिने विष्णु रिमाल पराजित भएका छन् । रिमाल उपमहासचिवमा पराजित भएका हुन् ।
९ पदाधिकारीमध्ये अध्यक्षसहित १७ जना ओली प्यानलबाट निर्वाचित हुँदा रिमालले भने जित दर्ता गर्न सकेनन् । तीनजना निर्वाचित हुने उपमहासचिव पदमा उनी चौथो स्थानमा रहे ।
उपमहासचिवमा पूर्वमाओवादी नेता लेखराजले भट्ट सबैभन्दा बढी भोट पाएका छन् । ओली प्यानलका उनले १४ सय ५२ मत ल्याए ।
ओली समूहकै रघुवीर महासेठ दोस्रो बढी मतसहित विजयी हुँदा ईश्वर पोखरेल प्यानलका योगेश भट्टराई तेस्रो हुँदै उपमहासचिव चुनिए ।
माओवादीबाट आएका लेखराज र ईश्वर प्यानलका योगेशको भन्दा कम मत पाएका रिमालले जम्मा एक हजार ९१ भोट ल्याउन सके ।
अहिलेसम्म भूगोलको राजनीति नगरेका रिमाल ओलीका अति विश्वासपात्रका रूपमा चिनिन्छन् ।
ओली तीनचोटि प्रधानमन्त्री हुँदा प्रमुख राजनीतिक सल्लाहकार रहेका उनी दशौँ महाधिवेशनमा प्रतिस्पर्धाविनै उपमहासचिव चुनिएका थिए । यसपटक ओली प्यानलबाट सोही पदमा उठेका उनी भारी मतले पराजित भएका हुन् । रिमालको ल्यापटपलाई नै एमालेको केन्द्रीय कमिटी भनेर बुझ्ने गरिन्थ्यो । एमालेको पूरै संगठन रिमालको ल्यापटपमा रहेको उनले भनेकै आधारमा ओलीले निर्णय गर्ने गरेको एमालेजनको बुझाइ छ ।
रिमालले ओलीलाई गलत सल्लाह दिएकै कारण भदौ २३ र २४ को घटना घटेको अधिकांश एमालेजनको बुझाई देखिन्छ ।
प्रतिक्रिया