अन्य दलका उम्मेदवारको पक्षपोषण हुने गरी अभिव्यक्ति दिन र फेसबुकमा लाइक गर्न कांग्रेसको प्रतिबन्ध

काठमाडौं । नेपाली कांग्रेस कञ्चनपुरले अन्य दलका उम्मेदवारको पक्षपोषण हुने गरी अभिव्यक्ति नदिन र उनीहरूको तस्बिर र स्टाटसमा लाइकसमेत नगर्नं नेता कार्यकर्ताहरूलाई निर्देशन दिएको छ ।

कांग्रेस कञ्चनपुरले बुधबार विज्ञप्ति जारी गरेर पार्टीका उम्मेदवारहरूबाहेकका अन्य उम्मेदवारहरूको पक्षपोषण हुने गरी कुनै पनि किसिमका अभिव्यक्ति नदिन निर्देशन दिएको हो ।

‘पार्टीका उम्मेदवारहरू बाहेकका अन्य उम्मेदवारहरूको पक्षपोषण हुने गरी कुनै किसिमका अभिव्यक्ति नदिन, सामाजिक सञ्जालमा पोष्ट, कमेन्ट र लाइक तथा कुनै पनि प्रचार–प्रसारजस्ता कार्यहरू नगर्न र कुनै किसिमका अभिव्यक्ति नदिन हुन निर्देशानुसार अनुरोध गरिन्छ,’ सचिव भीम भट्टद्वारा जारी विज्ञप्तिमा भनिएको छ ।

कांग्रेस कञ्चनपुरले नेता–कार्यकर्ताहरूलाई उम्मेदवारको पछि नलागेर आ–आफ्नो वडामा केन्द्रित भएर सक्रिय हुन पनि निर्देशन दिएको छ । आवश्यकता परेर अन्यन्त्र वडा क्षेत्रमा जानुपर्ने भए पार्टीलाई जानकारी गरएर मात्रै जान पनि भनिएको छ ।

‘आआफ्नो टोल वडा छोडेर उम्मेदवारको पछि–पछि लाग्ने परम्पराले स्थानीयबासीसँग छलफल, विचार आदानप्रदान तथा सहजीकरण कार्यमा असहजता उत्पन्न हुन जाने भएकाले आ–आफ्नो वडामा केन्द्रित भै सक्रिय हुन समस्त पार्टीका साथीहरुलाई अनुरोध गरिन्छ,’ विज्ञप्तिमा भनिएको छ, ‘आवश्यकता परी अन्यन्त्र वडा क्षेत्रमा जानुपर्ने भएमा पार्टीको सम्बन्धित सचिवालयलाई जानकारी गरी मात्र जान हुन अनुरोध गरिन्छ ।’

यसअघि कांग्रेस निर्वाचन परिचालन समितिका संयोजक एवं पार्टी उपसभापति विश्वप्रकाश शर्माले ७७ जिल्ला कार्यसमितिका लागि आचारसंहिता सर्कुलर गरेका थिए । जसमा कांग्रेसका उम्मेदवारदेखि नेता कार्यकर्ताले अन्य दलका उम्मेदवार वा मतदाताप्रति उग्र स्वभाव नदेखाउन, गालीगलौज नगर्न भनिएको थियो । त्यही भएर अहिलेसम्म कांग्रेसका कुनै पनि उम्मेदवारले विपक्षी उम्मेदवारप्रति गालीगलौज र आलोचना गर्ने गरेका छैनन् ।