घन्टी हुनेले बजाउँदै हिँडे जस्तै खुकुरी चिन्ह हुनेले नचाउँदै हिँड्ने भन्दै राप्रपा प्रवक्ता श्रेष्ठ आक्रोशित

काठमाडौं । राप्रपा प्रवक्ता मोहनकुमार श्रेष्ठले रास्वपाका नेता कार्यकर्ताले घन्टी बजाउँदै हिँडेर ध्वनि प्रदूषण गरेको भन्दै आपत्ति जनाएका छन् । रास्वपा कार्यकर्ताको ज्यादतीबारे निर्वाचन आयोगले मौनता साँधेको भन्दै उनले आक्रोश व्यक्त गरेका छन् ।

श्रेष्ठले रास्वपा कार्यकर्ता र समर्थककै जस्तो आतंक खुकुरी, डोजर चुनाव चिन्ह हुने उम्मेदवार र तिनका समर्थकले गरेमा के होला अवस्था भन्दै निर्वाचन आयोगप्रति प्रश्न गरेका छन् ।

‘निर्वाचन आचारसंहिताको पालना गर्ने, गराउने सवालमा गम्भीर हुन निर्वाचन आयोगको ध्यानाकर्षण गराउँदछौं। घण्टी चिन्ह हुने दलले ध्वनि प्रदुषण हुने गरी घण्टी बजाउँदै देशव्यापी निर्वाचन आचारसंहिता उल्लंघन गरिरहँदा आयोगले नदेखेजस्तो, नसुनेजस्तो गरिरहनु विडम्बनापूर्ण छ। खुकुरी चिन्ह हुनेले घण्टी बजाउँदै हिडेजस्तो खुकुरी नचाउँदै हिड्ने, डोजर चिन्ह हुनेले सडक र राजमार्ग अवरुद्ध हुने गरी डोजर चलाउँदै हिड्ने अवस्था आयो वा हिड्यो भने निर्वाचन आयोगका लागि त्यो पनि स्विकार्य हुनसक्छ ?’ उनले आयोगप्रति प्रश्न गरेका छन् ।

‘बिहीबार राति तुलसीपुरमा एउटा दलको झण्डा जलाउँदा क्रिया प्रतिक्रियाहरु उत्पन्न भए। झण्डा जलाइनु अनुचित थियो। त्यसैदिन राजा वीरेन्द्रको शालिकमाथि झण्डा जलाउने दलका कार्यकर्ताबाट अपमानजनक र दुर्व्यवहार समेत भयो, यो उछृङ्खलता र उद्दण्डताको पराकाष्ठा हो। सम्बन्धित दलले क्षमायाचनासमेत नगर्नु दुर्भाग्यपूर्ण छ। इतिहासको सम्मान नगर्नेहरु उग्रवादका नयाँ भेरियन्ट हुन्। शालिकमाथि दुर्व्यवहार गरिएको घटनाको निन्दा गर्दछौं,’ उनले भनेका छन् ।

यस्तै, रौतहटमा सामाजिक एकता र सदभाव खल्बल्याउने, साम्प्रदायिक वैमनस्यता पैदा गर्ने गरी भएका घटना चिन्ताजनक रहेको उनले जनाएका छन् । ‘कुनै पनि बहानामा हिन्दु र हिन्दुत्वमाथि लक्षित घटनामा हामी चनाखो रहनेछौं। सामाजिक सदभाव र एकता कायम गर्न अपील गर्दछौं। साथै, यस्ता घटना हुन नदिन सरकारको गम्भीर ध्यानाकर्षण गराउँदछौं,’ उनले भनेका छन् ।