काठमाडौं। प्रधानमन्त्री सुशीला कार्कीले प्रत्येक नागरिकको मतले आफ्नो भविष्य सुनिश्चित गर्ने बताएकी छिन्। मतदान सुरु भएपछि उनले सामाजिक सञ्जालमार्फत यस्तो बताएकी हुन्।
‘मतदान केन्द्रमा पुगेर आफ्नो बहुमूल्य मताधिकार प्रयोग गर्न म हार्दिक आग्रह गर्छु। हाम्रो भविष्य निर्धारण गर्न तपाईंको प्रत्येक मत महत्त्वपूर्ण छ। शान्तिपूर्ण निर्वाचनको लागि तपाईंले देखाउनुभएको धैर्य र समझदारीको लागि धन्यवाद,’ उनले भनेकी छन् ।
जेनजी विद्रोहपछि ६ महिनामै निर्वाचन हुन लागेको हो । पूर्वप्रधानन्यायाधीशसमेत रहेकी प्रधानमन्त्री कार्की नेतृत्वको अन्तरिम सरकारले यस्तो बेला चुनाव गराएको हो । प्रधानमन्त्री कार्कीलाई चुनाव गराउन वकिलसमेत रहेका गृहमन्त्री ओमप्रकाश अर्यालले बलियो साथ दिएका छन् । यो ६ महिनामा सबै दललाई सहमतिमा ल्याएर चुनाव गराउनसक्नु सामान्य विषय होइन । यसमा प्रधानमन्त्री कार्की र गृहमन्त्री अर्याल सफल बनेका छन् ।
गृहमन्त्री अर्यालले मतदातालाई योग्य जनप्रतिनिधि र दल छान्न आग्रह गरेका छन् । लहडको भरमा मतदान गर्न हुँदैन, राजनीतिक संस्कार भएकाहरूलाई मत दिनुपर्छ, राजनीतिक संस्कार नभएका व्यक्ति संसद् अथवा सरकारमा गए भने मुलुकलाई राम्रोभन्दा नराम्रो बढी हुनसक्छ । उनीहरूले प्रणाली भत्काउन सक्छन् । त्यस कारण राजनीतिक संस्कार सबैभन्दा ठूलो हो । जसलाई मत दिए पनि राजनीतिक संस्कारको माग गर्न उनले अपिलसमेत गरेका छन् ।
जेनजी आन्दोलनपछिको विशेष परिस्थितिमा हुन लागेको प्रतिनिधिसभा सदस्य निर्वाचनअन्तर्गत आज मतदान हुँदैछ । मुलुकका ७७ वटै जिल्लामा बिहान ७ देखि अपराह्न ५ बजेसम्म एकै चरणमा मतदान हुनेछ । मुलुक सङ्घीय लोकतान्त्रिक गणतन्त्रमा प्रवेश गरेपछि भएको प्रतिनिधिसभाको यो तेस्रो निर्वाचन हो । यसअघि २०७४ र २०७९ सालमा निर्वाचन भएको थियो ।
आज ‘पहिलो हुने निर्वाचित हुने निर्वाचन प्रणाली’ ९प्रत्यक्ष०तर्फ १६५ निर्वाचन क्षेत्र र समानुपातिकतर्फ ११० स्थानका लागि निर्वाचन हुनेछ । प्रत्यक्षतर्फ ६१ वटा निर्वाचन चिह्नमा ६५ वटा राजनीतिक दलले प्रतिस्पर्धा गर्दैछन् । प्रत्यक्षतर्फ तीन हजार १७ पुरुष, ३८८ महिला र एक अन्य गरी तीन हजार ४०६ उम्मेदवार चुनावी प्रतिस्पर्धामा छन् । यस्तै, समानुपातिक निर्वाचन प्रणालीतर्फ एक हजार ३६३ पुरुष र एक हजार ७७२ महिला गरी तीन हजार १३५ उम्मेदवार प्रतिस्पर्धामा छन् ।
यस पटकको निर्वाचनमा ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य गरी एक करोड ८९ लाख तीन हजार ६८९ मतदाता छन् । यस्तै, एक लाख ८६ हजार १४२ अस्थायी मतदाता कायम भएको निर्वाचन आयोगले जनाएको छ । निर्वाचनका लागि देशभर १० हजार ९६७ मतदानस्थलमा २३ हजार ११२ मतदान केन्द्र निर्धारण गरिएका छन् । यस्तै, १४३ अस्थायी मतदानस्थल तय गरिएका छन् । ज्येष्ठ नागरिक, अपाङ्गता भएका व्यक्ति तथा अशक्त र गर्भवतीलगायतलाई सहज मतदानका लागि प्राथमिकता दिने व्यवस्था गरिएको निर्वाचन आयोगले जनाएको छ ।
प्रतिक्रिया