इस्लामावाद । अफगानिस्तान र पाकिस्तानबीचको सीमामा पुनः तनाव चुलिएको छ। अफगान तालिवान फौजले सीमावर्ती पाकिस्तानी सुरक्षा चौकीहरूलाई लक्षित गरी राति गोलाबारी गरेको पाकिस्तानी अधिकारीहरूले दाबी गरेका छन्।
पाकिस्तानी अधिकारीहरूका अनुसार सीमापारबाट लडाकुहरू घुसपैठ गर्ने प्रयासमा रहेका बेला पाकिस्तानी सेनाले त्यसलाई विफल पारेपछि अफगान पक्षबाट गोलाबारी भएको हो। सीमाक्षेत्रमा सुरक्षा सतर्कता बढाइएको र सम्भावित घुसपैठ तथा आक्रमण रोक्न सुरक्षाकर्मी परिचालन गरिएको उनीहरूको भनाइ छ।
तर, अफगानिस्तानको तालिवान सरकारका प्रवक्ता जबिमुल्लाह मुजाहिदले पाकिस्तानी पक्षको दाबी अस्वीकार गरेका छन्। उनले अफगान तालिवान सेनाले पाकिस्तानी सीमावर्ती क्षेत्रमा त्यस्तो कुनै आक्रमण नगरेको बताएका छन्।
दुवै पक्षले घटनाबारे फरक–फरक दाबी गरेसँगै दुई देशबीचको पछिल्लो तनाव थप जटिल बनेको छ। सीमाक्षेत्रमा हुने यस्ता घटनाले दुई देशबीच लामो समयदेखि जारी सुरक्षा विवादलाई थप चर्काउने चिन्ता बढेको छ।
पछिल्लो घटनाले क्षेत्रीय शक्ति राष्ट्रहरूको मध्यस्थतामा अघि बढिरहेको शान्ति प्रयाससमेत प्रभावित हुन सक्ने देखिएको छ। यसअघि पाकिस्तानी लडाकु विमानहरूले पूर्वी अफगानिस्तानका विभिन्न क्षेत्रमा हवाई आक्रमण गरेका थिए। त्यसको केही दिनपछि सीमाक्षेत्रमा पुनः झडपको घटना बाहिर आएको हो।
यसैबीच, पाकिस्तानको उत्तरपश्चिमी क्षेत्रमा पर्ने कोहात सहरलाई लक्षित गरी प्रहार गरिएका दुईवटा ड्रोन निष्क्रिय पारिएको पाकिस्तानी अधिकारीहरूले बताएका छन्। उनीहरूका अनुसार सुरक्षा निकायले ड्रोनको जोखिमलाई नियन्त्रणमा लिएको छ।
पाकिस्तानी अधिकारीहरूले पछिल्लो घटनालाई आफ्नो हवाई सुरक्षा प्रणाली सम्भावित खतराको सामना गर्न तयार रहेको प्रमाणका रूपमा व्याख्या गरेका छन्। यद्यपि, ड्रोन आक्रमणको जिम्मेवारी र त्यसको विस्तृत अवस्थाबारे स्वतन्त्र पुष्टि हुन बाँकी छ।
अफगानिस्तान र पाकिस्तानबीच सीमा तथा सुरक्षा विषयलाई लिएर लामो समयदेखि तनाव रहँदै आएको छ। विशेषगरी सीमापारबाट हुने लडाकु गतिविधि, सुरक्षा चौकीमाथिका आक्रमण तथा आतंकवादी समूहको उपस्थितिलाई लिएर दुई देशबीच आरोप–प्रत्यारोप हुँदै आएको छ।
पाकिस्तानले अफगान भूमिबाट आफ्नाविरुद्ध गतिविधि भइरहेको आरोप लगाउँदै आएको छ भने तालिवान सरकारले त्यस्ता आरोप अस्वीकार गर्दै आएको छ। यही विवादका कारण सीमाक्षेत्रमा पटक–पटक तनाव र झडपका घटना हुँदै आएका छन्।
यसैबीच, चीन, टर्की, कतार र साउदी अरेबियालगायत देशले पाकिस्तान र अफगानिस्तानबीच स्थायी शान्ति कायम गर्न कूटनीतिक तथा मध्यस्थता प्रयास गरिरहेका छन्। तर सीमाक्षेत्रमा पुनः तनाव बढेपछि ती प्रयासमा चुनौती थपिएको छ।
दुवै देशबीच तनाव कम गर्न तत्काल संवाद र कूटनीतिक पहल आवश्यक रहेको क्षेत्रीय विश्लेषकहरूले बताउँदै आएका छन्। सीमामा हुने थप सैन्य गतिविधिले दुई देशबीचको सम्बन्ध मात्र नभई सम्पूर्ण क्षेत्रीय सुरक्षामा समेत असर पार्न सक्ने चिन्ता व्यक्त गरिएको छ।
प्रतिक्रिया