काठमाडौं– गायिका स्मिता दाहालको विवाहमा भारतीय प्रधानमन्त्री नरेन्द्र मोदीले शुभकामना सन्देश पठाएका छन् । आमा गंगा दाहालले फेसबुकमार्फत सार्वजनिक गरेकी हुन् ।
पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’की नातिनी समेत रहेकी स्मिता गत शुक्रबार प्रेमी सायुज्य श्रेष्ठसँग विवाह बन्धनमा बाँधिएकी थिइन् । उनीहरुको विवाहमा प्रधानमन्त्री मोदीले पठाएको शुभकामना सन्देश आमा गंगा दाहालले सार्वजनिक गरेकी हुन् । सन्देशमा मोदीले स्मिता र सायुज्यलाई जीवनभरको विश्वास र एकताको यात्रा सुरु गरेकोमा हार्दिक बधाई दिएका छन् ।
गंगा दाहाललाई सम्बोधन गर्दै गत डिसेम्बर २ मा पठाइएको पत्रमा भनिएको छ, ‘उहाँहरूको दाम्पत्य जीवनको हार्दिक शुभकामना व्यक्त गर्दछु । ६ डिसेम्बर २०२४ मा हुने विवाह समारोहका लागि निमन्त्रणाका लागि तपाईँ र परिवारको लागि म हृदयदेखि आभारी छु । कृपया श्री पुष्पकमल दाहालजीलाई पनि हार्दिक बधाई तथा शुभकामनाको सन्देश सुनाइदिनु होला ।’
उक्त पत्रले प्रचण्ड र भारतीय प्रधानमन्त्री मोदीबिचको सम्बन्ध सुमधुर रहेको देखिएको छ । प्रचण्डले आफ्नो प्रधानमन्त्रीकालमा भारतसँग विद्युत् व्यापारलगायत महत्त्वपूर्ण सम्झौतासमेत गरेका थिए ।

प्रतिक्रिया