काठमाडौं । कीर्तिमानी नेपाली पर्वतारोही निर्मल पुर्जा ‘निम्स दाइ’को असामयिक निधनप्रति श्रद्धाञ्जली व्यक्त गर्दै म्याग्दीको अन्नपूर्ण गाउँपालिकाले सोमबार (साउन १८ गते) सार्वजनिक शोक बिदा घोषणा गरेको छ।
अन्नपूर्ण गाउँपालिका–३, दाना निवासी पुर्जाको पाकिस्तानस्थित ८,०५१ मिटर अग्लो ब्रोड पिक हिमाल आरोहणका क्रममा गएको हिमपहिरोमा परी निधन भएको थियो। उक्त दुर्घटनामा उनीसहित ६ जना नेपाली पर्वतारोहीले ज्यान गुमाएका छन्।
गाउँपालिका अध्यक्ष भरतकुमार पुनद्वारा जारी विज्ञप्तिअनुसार दिवंगत पर्वतारोहीप्रति सम्मान प्रकट गर्न गाउँपालिका मातहतका सबै सरकारी कार्यालय, वडा कार्यालय तथा शैक्षिक संस्थामा सोमबार सार्वजनिक शोक बिदा दिइने भएको हो।
गाउँपालिकाले विज्ञप्तिमार्फत निर्मल पुर्जाले विश्व पर्वतारोहण क्षेत्रमा नेपाललाई अन्तर्राष्ट्रिय स्तरमा चिनाउन पुर्याएको योगदान अतुलनीय रहेको उल्लेख गरेको छ। विश्वका ८ हजार मिटरभन्दा अग्ला १४ वटै हिमाल छोटो समयमै आरोहण गरी उनले कायम गरेको विश्व कीर्तिमानले नेपाललाई विश्वसामु नयाँ उचाइमा पुर्याएको गाउँपालिकाको भनाइ छ।
विज्ञप्तिमा दिवंगत आत्माको चिरशान्तिको कामना गर्दै शोकसन्तप्त परिवारजनप्रति गहिरो समवेदना व्यक्त गरिएको छ। साथै, निर्मल पुर्जाको निधनले नेपालको पर्वतारोहण, साहसिक पर्यटन र अन्तर्राष्ट्रिय पहिचानमा अपूरणीय क्षति पुगेको उल्लेख गरिएको छ।
प्रतिक्रिया