जनकपुरधाम — सप्तरीको राजविराजस्थित सरकारी गजेन्द्रनारायण सिंह अस्पतालमा सुत्केरी गराउन पुगेकी एक गर्भवती महिलाले अस्पतालको गेटबाहिर सडकमा बच्चा जन्माउन बाध्य भएको घटना सार्वजनिक भएको छ।
मंगलबार राति करिब २ बजेतिर सुत्केरी गराउन अस्पताल पुगेकी ती महिलाले अस्पतालले मागेको रकम तिर्न नसकेपछि आफूलाई अस्पतालबाट बाहिर निकालिएको आरोप लगाएकी छन्। त्यसपछि अस्पतालको गेटबाहिरै उनले बच्चा जन्माउनुपरेको बताइएको छ।
आधुनिक समयमा हेलिकप्टरको सुविधा सहज बन्दै गए पनि मधेस प्रदेशमा भने अझै यसको पर्याप्त पहुँच हुन नसकेको देखिन्छ।
गरिब तथा विपन्न नागरिकका लागि आशाको केन्द्र मानिने सरकारी अस्पतालमै यस्तो घटना भएको आरोप सार्वजनिक भएपछि स्वास्थ्य सेवा र अस्पतालको व्यवस्थापनमाथि गम्भीर प्रश्न उठेको छ।
घटना सत्य भएमा यो अत्यन्तै दुःखद, संवेदनशील र अमानवीय अवस्था भएको भन्दै जनप्रतिनिधिसहित विभिन्न क्षेत्रबाट छानबिन र आवश्यक कारबाहीको माग उठ्न थालेको छ।
उपचारका लागि अस्पताल पुगेकी गर्भवती महिलाले आर्थिक अभावकै कारण अस्पतालको ढोकाबाहिर बच्चा जन्माउनुपर्ने अवस्था आउनु राज्यको स्वास्थ्य प्रणालीप्रति गम्भीर प्रश्न भएको सरोकारवालाहरूको भनाइ छ।
गरिब भएकै कारण कुनै पनि नागरिक स्वास्थ्य सेवाबाट वञ्चित हुन नहुने भन्दै घटनाको सत्यतथ्य छानबिन गरी दोषी देखिए आवश्यक कारबाही गर्नुपर्ने माग गरिएको छ।
स्वास्थ्य सेवा मानव अधिकार हो—आर्थिक अवस्था हेरेर नागरिकको जीवनसँग खेलवाड गर्ने विषय होइन।
प्रतिक्रिया