काठमाडौं । राष्ट्रिय स्वतन्त्र पार्टी (रास्वपा) ले सांसद खगेन्द्र सुनारको विवादित अडियो प्रकरणमा छानबिन सुरु गरेको छ। पार्टीका प्रमुख सचेतक कविन्द्र बुर्लाकोटीले छानबिनबाट सुनार दोषी ठहरिए पार्टीको नियमअनुसार कारबाही गरिने बताएका छन्।
मंगलबार काठमाडौंमा सञ्चारकर्मीसँग कुरा गर्दै बुर्लाकोटीले पार्टीको केन्द्रीय अनुशासन आयोगले अडियो प्रकरणबारे अनुसन्धान अघि बढाइसकेको जानकारी दिए। उनले छानबिनबाट सुनारको गल्ती पुष्टि भए कारबाही हुने र दोषी नदेखिए कारबाही नगरिने स्पष्ट पारे।
बुर्लाकोटीका अनुसार छानबिन प्रक्रिया टुङ्गोमा नपुग्दासम्म सुनारलाई पदीय हैसियतमा कुनै पनि औपचारिक कार्यक्रममा सहभागी नहुन निर्देशन दिइएको छ।
केही प्रमाणसहित अडियो सार्वजनिक भएकाले त्यसको सत्यतथ्य पत्ता लगाउन अनुशासन आयोगलाई जिम्मेवारी दिइएको उनले बताए। आयोगले गर्ने छानबिनका आधारमा पार्टीले आवश्यक निर्णय लिने उनको भनाइ छ।
अडियो प्रकरणमा राज्यका प्रचलित कानुन आकर्षित हुने अवस्था देखिए सरकारी निकायले गर्ने अनुसन्धानमा पार्टीले पूर्ण सहयोग गर्ने प्रतिबद्धतासमेत बुर्लाकोटीले जनाएका छन्।
उनले छानबिनबाट सुनारको गल्ती नभएको पुष्टि भए कारबाही नहुने र गल्ती गरेको प्रमाणित भए पार्टीको नियमअनुसार अघि बढ्ने बताए। रास्वपाले यस प्रकरणमा छानबिनको निष्कर्षपछि मात्रै थप निर्णय लिने जनाएको छ।
प्रतिक्रिया