काठमाडौं । साउदी अरबको राजधानी रियादमा आइतबार बिहान तीनवटा विस्फोटको आवाज सुनिएको छ। विस्फोट हुनुअघि सहरका बासिन्दालाई हवाई खतराबारे सचेत गराउँदै मोबाइलमा सन्देश पठाइएको थियो।
समाचार संस्था एएफपीका अनुसार मोबाइल सन्देशमार्फत मानिसहरूलाई सुरक्षित स्थानमा आश्रय लिन आग्रह गरिएको थियो। चेतावनीपछि रियादमा विस्फोटका आवाज सुनिएका हुन्।
यसैबीच, साउदी अरबको नेतृत्वमा रहेको सैन्य गठबन्धनले यमनका हुथी विद्रोहीले प्रहार गरेको एउटा ब्यालिस्टिक क्षेप्यास्त्रलाई हवाई प्रतिरक्षा प्रणालीमार्फत आकाशमै रोकेर नष्ट गरेको दाबी गरेको छ।
यद्यपि, रियादमा सुनिएका तीनवटै विस्फोटका आवाज उक्त क्षेप्यास्त्रलाई नष्ट गरिएसँग सम्बन्धित थिए वा थिएनन् भन्ने स्पष्ट भइसकेको छैन। घटनामा मानवीय क्षति वा भौतिक नोक्सानी भएको विवरण पनि सार्वजनिक भएको छैन।
यमनका हुथी विद्रोहीले पछिल्ला दिनमा साउदी अरबका विमानस्थल तथा तेल केन्द्रलाई लक्षित गरी आक्रमण तीव्र बनाइरहेका बेला यो घटना भएको हो। हुथी विद्रोहीले आगामी दिनमा पनि यस्ता आक्रमण जारी राख्ने चेतावनी दिएका छन्।
रियादमा सुनिएका विस्फोटको वास्तविक कारण र घटनाको प्रभावबारे थप विवरण आउन बाँकी छ।
प्रतिक्रिया