काठमाडौं खतरा बढ्यो: अहिलेसम्मकै बढी कोरोना संक्रमित भेटिए !

काठमाडौं उपत्यकामा पछिल्लो २४ घण्टामा थप १ सय ३४ जनामा कोरोना संक्रमण पुष्टि भएको छ । स्वास्थ्य तथा जनसङ्ख्या मन्त्रालयद्वारा आयोजित नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले उपत्यकाका तीन वटा जिल्लामा एक सय ३४ जनामा कोरोना सङ्क्रमण पुष्टि भएको जानकारी दिएका हुन् ।

आज थपिएका संक्रमितहरु काठमाडौं जिल्लाका ११० जना, भक्तपुर जिल्लाका ८ जना र ललितपुर जिल्लामा १६ जना रहेका छन् । आज देखिएका काठमाडौँका संक्रमितहरु आजसम्म कै बढी रहका छन् । मंगलबार नेपालभर थप ६३८ जनामा कोरोना संक्रमण पुष्टि भएको छ । योसँगै सङ्क्रमितको सङ्ख्या २३ हजार ९४८ पुगेको छ ।

प्रवक्ता डा गौतमका अनुसार पछिल्लो २४ घण्टामा थप १७१ जना उपचारपछि निको भएर घर फर्किएका छन् । योसँगै कोरोनाबाट निको हुनेको संख्या १६ हजार ६६४ पुगेको छ । यस्तै पछिल्लो २४ घण्टामा थप चार जनाको मृत्यु भएको छ । योसँगै नेपालमा कोराना संक्रमणबाट मृत्यु हुनेको संख्या ८३ पुगेको छ ।