काठमाडौं– नारायणगढ–मुग्लिन सडकको सिमलतालमा लेदोसहितको पहिरोले बगाउँदा त्रिशूलीमा दुईवटा बसमध्ये एउटा बसबाट तीनजना यात्रुले ज्यान जोगाउन सफल भएका छन् । काठमाडौंबाट रौतहटको गौर गइरहेको गणपती डिलक्स बसलाईबसमा सवारमध्ये ३ जना यात्रुले भने हाम फालेर आफ्नो ज्यान जोगाएका हुन् ।
रौतहटको देवाही गोनाहीका दुई जना र वृन्दावन नगरपालिकाको सिसवा धमौराका एक जनाले पहिरोले बस बगाउन लाग्दा हाम्फालेर आफ्नोे ज्यान जोगाएका हुन् ।
उनीहरुलाई बस खसेको स्थानबाट उद्धार गरेर अर्को बसमा चढाइ नारायणगढ पुर्याइएको छ । ती यात्रुहरुले बस खस्न थालेपछि आफूहरु क्याबिनतिरको झ्यालबाट हाम फालेर ज्यान जोगाएको बताएका छन् ।
ती यात्रुका अनुसार क्याबिनमा चार जना पनि थिए । उनीहरुले आफूसँगैका यात्रु र आफ्ना झोलासहितका सामान बेपत्ता भएको बताएका छन् । आज बिहान करिब साढे तीन बजेतिर वीरगञ्जबाट काठमाडौं आउँदै गरेको विङर गाडी र काठमाडौंबाट गौरतर्फ जाँदै गरेको गणपति डिलक्स बस नदीमा खसेका थिए ।
सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटार बाट गएको गोताखोर सहितको टोलीले उद्धार कार्य सुरु गरेको छ । गौर जाँदै गरेको बसमा ४१ र काठमाडौं आउँदै गरेको बसमा २४ जना यात्रु रहेको अनुमान छ । यद्यपि यात्रुहरुको एकिन विवरण भने थाहा हुन सकेको छैन ।
प्रतिक्रिया