घरमा पालेको कुकुर मारेको निहुँमा झगडा, छोराले गरे बुबाको हत्या

रुपन्देही– घरमा पालेको कुकुरलाई मारेको निहुँमा बाबुछोराको झगडा पर्दा एक छोराले बुबाको हत्या गरेका छन् ।

यो घटना पूर्वी नवलपरासीको कावासोती नगरपालिका– ५ ठकुरीचोकमा घटेको हो । ठकुरीचोकका १८ वर्षीय निराजन कुमालले ढुंगाले हानेर ४३ वर्षीय बुवा प्रेमको हत्या गरेका छन् । प्रहरीका अनुसार बुधबार बिहान सवा ११ बजे उक्त घटना घटेको हो ।

जिल्ला प्रहरी कार्यालयका डीएसपी बेद पौडेलका अनुसार घरमा पालेको कुकुरलाई कुटेको निहुँमा बाबुछोराको झगडा भएको थियो । प्रेमको कुटाइबाट घरमा पालेको कुकुरको मृत्यु भएको थियो । सोपछि बाबु छोराबिच झगडा परेको थियो ।

‘कुकुरलाई कुटेको निहुँमा झगडा हुँदा निराजनले ढुंगाले टाउकोमा हानेको र बुवाको घटनास्थलमै मृत्यु भएको पाइयो’, डिएसपी पौडेलले बताएका छन् ।

घटनापछि प्रहरी टोलीले छोरा निराजनलाई पक्राउ गरेको छ । उनलाई पक्राउ गरि घटनाबारे थप अनुसन्धान अघि बढाएको प्रहरीले जनाएको छ ।