समुह चरणबाट बाहिरिएपछि स्वदेश फर्कियो महिला क्रिकेट टोली

काठमाडौं– एसिसी महिला एसिया कप–२०२४ खेलेर नेपाली टोली स्वदेश फर्किएको छ । श्रीलंकामा भएको प्रतियोगितामा समूह चरणबाटै बाहिरिएपछि नेपाली महिला क्रिकेट टोली बिहिबार नेपाल फर्किएको हो ।

प्रतियोगिताको समूह चरणको पहिलो खेलमा युएईलाई पराजित गरेको नेपाल त्यसपछि पाकिस्तान र भारतसँग पराजित भएको थियो । युएईलाई ६ विकेटले जितेको नेपाल पाकिस्तानसँग ९ विकेटले र भारतसँग ८२ रनले पराजित भएको थियो ।

नेपाल रहेको समूह ‘ए’ बाट भारत र पाकिस्तान तथा समूह ‘बी’ बाट श्रीलंका र बंगलादेश सेमिफाइनलमा प्रवेश गरेका छन् । सेमिफाइनलका दुवै खेल भोलि हुनेछन् । सेमिफाइनलमा भारतले बङ्गलादेश तथा श्रीलङ्काले पाकिस्तानसँग खेल्नेछन् ।