बुधबार दुर्घटनामा परेको विमानका क्याप्टेनले भने, ‘जहाज माथि लैजान सकिनँ, सानो प्वालबाट बाहिर निस्किएँ’

काठमाडौं– बुधबार सौर्य एयरलाइन्सको जहाज दुर्घटनामा बाँच्न सफल भएका क्याप्टेन मनिष शाक्यले आफुले जहाज कन्ट्रोल गर्न नसकेको बताएका छन् । सिनामंगलस्थित काठमाडौं मेडिकल कलेजमा उपचाररत उनले अस्पतालको मेडिकल डाइरेक्टलाई यस्तो बताएका हुन् ।

उनी अहिले हल्का बोल्न र झोलिलो पदर्थ पिउन सक्ने अवस्थामा छन् । बिहीबार बिहान केएमसीकी मेडिकल डाइरेक्टर डा। मिना थापासँग कुराकानी गर्दै क्याप्टेन शाक्यले जहाजलाई कन्ट्रोल गर्न नसकिएको बताएका थिए ।

‘करिब १०० फिटमा पुगेपछि जहाज माथि लैजान सकिनँ । तल खस्न थाल्यो, त्यसपछि जहाज मेरो नियन्त्रणमा भएन ।’ शाक्याको भनाई उद्धत गर्दै डाक्टर थापाले भनिन्,
‘एकैपल्ट थिचिएको जस्तो अनुभव भयो । सानो प्वालबाट आफैं बाहिर निस्किएँ । त्यसबाट नस्किन लाग्दा कसैले मलाई तानेको याद छ ।’

उनको अस्पतालको न्यूरो आईसीयूमा उपचार भइरहेको छ । उनको शरीरका विभिन्न भागमा चोटपटक लागेको छ । मुख, खुट्टा, आँखाको भाग, टाउको लगायतमा चोटपटक लागेको छ । शाक्यको नाकको हड्डी र ढाडको एक हड्डी भाँचिएको छ । पाइलट शाक्यको स्वास्थ्यमा रहेको थप जटिलता पहिचानका लागि आज एमआरआई गर्ने तयारी रहेको छ ।

काठमाडौंबाट बुधबार बिहान ११ः११ मा पोखराका लागि उडेको ९ एन–एएमई सीआरजे विमान त्रिभुवन अन्तर्राष्ट्रिय विमानस्थलबाट उडेलगत्तै परिसरभित्रै दुर्घटना भएको थियो । उक्त विमानमा चालक दल दुई जना, एक नाबालक, एक महिला र सौर्य एयलाइन्सका प्राविधिक गरि १९ जना सवार थिए । पाइलट शाक्यको घाइते अवस्थामा उद्धार गरेर केएमसी अस्पतालमा ११ः३० मा पुर्‍याइएको थियो । घटनामा परेर अन्य १८ जनाको मृत्यु भएको छ । मृतकको शव त्रिभुवन शिक्षण अस्पतालमा पोस्टमार्टम भइरहेको छ ।