खोलामा डुबेर बालिका बेपत्ता, बचाउन गएका पुरुषको मृत्यु

सर्लाही– सर्लाहीमा खोलामा डुबेर एकजनाको मृत्यु भएको छ भने एक जना बालिका बेपत्ता भएकी छन्।

बलरा नगरपालिकास्थित रहेको मनुसमारा खोलामा डुबेर वडा नम्बर १ स्थित हथिऔल गाउँका ६० वर्षीय गजेन्द्र साहको मृत्यु भएको प्रहरीले जनाएको छ।

खोलामा डुबेर १२ वर्षीया निशा कुमारी गिरी बेपत्ता भएकी छिन् । उनको खोजीकार्य जारी रहेको जिल्ला प्रहरी कार्यालय सर्लाहीले जानकारी दिएको छ ।

प्रहरीका अनुसार निशा आज दिउँसो १ बजेतिर साथीहरूसँग खोला तरेर घाँस काट्न जाँदै थिइन्। त्यसै बेला मनुसमारा खोला तर्ने क्रममा निशा र उनकी साथी खोलामा डुबिरहेको देखेपछि गजेन्द्र बचाउन गएका थिए। निशासँगै घाँस काट्न हिँडेकी १५ वर्षीया पिंकी कुमारी गिरी भने पौडी खेलेर खोलाबाट सकुशल निस्किन सफल भएकी थिइन् । तर गजेन्द्रको भने डुबेर मृत्यु भयो भने निशा वेपत्ता भइन् ।

गजेन्द्रको शव पोष्टमर्टमका लागि प्रादेशिक अस्पताल मलंगवा पठाइएको प्रहरीले जनाएको छ।