स्पेनका कान्छा खेलाडी लामाइन यमालका बुबामाथी छुरा प्रहार

काठमाडौं– युरोकप २०२४ मा उत्कृष्ट प्रदर्शन गरेर संसारभरी चर्चित बनेका १७ वर्षीय स्पेनिस फुटबल स्टार लामाइन यमालका बुबामाथी छुरा प्रहार भएको छ । उनलाई एक कार पार्किङ स्थलमा धेरै पटक छुरा प्रहार गरेको बताइएको छ ।

स्पेनिस मिडियाका रिपोर्टलाई उदृत गर्दै बिबिसीले यामालका बुबा मौनिर नसराउईमाथि बार्सिलोनाको उत्तरमा रहेको माटारोको तटीय शहरमा बुधबार राति एक समुहले आक्रमण गरेको हो । उनीमाथि आक्रमण गरेको समुहसँग उनले अघिल्लो दिन कुरा गरेको समेत बताइएको छ ।

यामालका बुबामाथी छुरा प्रहार गर्ने तीन जनालाई क्याटालान प्रहरीले बुधबार पक्राउ गरेका थिए । बाँकी एक जनालाई बिहिबार पक्राउ गरिएको छ । नासरौईलाई गम्भीर अवस्थामा बार्सिलोनाको एक अस्पतालमा पुर्याइएको थियो । हाल उनी खतरामुक्त अवस्थामा छन् ।

घटनाको अघिल्लो दिन नसराउईले आफ्नो कुकुरलाई डुलाइरहेको क्रममा मानिसहरूको समूहसँग झगडा गरेको स्पेनी पत्रिका एल पेसले लेखेको छ । झगडा वरेको केही घण्टापछि कार पार्कमा बोलाएर सोहि समुहले पटक पटक छुरा प्रहार गरेको हो ।

स्पेनका सबैभन्दा कान्छो खेलाडी लामाइन यामालले युरो २०२४ को उपाधि जितेका थिए । जहाँ उनी प्रतियोगिताको कान्छो खेलाडी घोषित भएका थिए।