काठमाडौं – इक्वेडरका राष्ट्रिय फुटबल खेलाडी मार्को एङ्गुलोको निधन भएको छ । कार दुर्घटनामा परी गम्भीर घाइते भएका २२ वर्षीय एङ्गुलोको उपचारका क्रममा बुधबार निधन भएको हो ।
उनको निधनबारे इक्वेडर फुटबल फेडेरेसनले एक विज्ञप्ति जारी गर्दै जानकारी दिएको छ । ‘मार्को एक उत्कृष्ट खेलाडी मात्र नभएर एक उत्कृष्ट साथी पनि थिए, हाम्रो फुटबल महासंघ एङ्गुलोको मृत्युमा गहिरो सहानुभूति व्यक्त गर्दछ’, विज्ञप्तिमा लेखिएको छ ।
२०१९ देखि यु–१९ फूटबल खेल्न थालेका उनले सन् २०२२ मा सिनियर राष्ट्रिय टोलीका लागि डेब्यु गरेका थिए । उनले राष्ट्रिय टोलीबाट ९ अन्तर्राष्ट्रिय खेल खेलेका छन् ।
यसबाहेक २०२० देखि क्लबमा आबद्ध उनी २०२३ मा लियोनल मेस्सी खेलिरहेको लिग मेजर लिग सकरकै क्लब सिनसिनाटी एफसीबाट खेलेका थिए भने यसै वर्ष इक्वेडरकै क्लब एलडियू क्विटोमा लोनमा अनुबन्ध भएका थिए ।
प्रतिक्रिया