कप्तान पूजा महतोलाई महोत्तरीमा भव्य स्वागत
काठमाडौं– महिला क्रिकेटमा इतिहास रच्न विशेष योगदान पुर्याएको भन्दै यु–१९ महिला क्रिकेट टोलीकी कप्तान पूजा महतोलाई आज गृहनगरमा भव्य स्वागत गरिएको छ ।
महोत्तरीकी महतोलाई उनको गृहजिल्लामा क्षेत्र नम्बर १ का सांसद लक्ष्मी महतो, गौशाला नगरपालिकाका नगर प्रमुख दिपेन्द्र महतो, उपप्रमुख रेणु महतो र नगरबासीले भव्य स्वागत गरेका हुन् ।
उनलाई बधाई दिँदै उनीहरुले अगामी दिनमा अझ सफलता प्राप्त गर्ने आशीर्वाद दिएका छन् । कप्तान महतोलाई गाडीमा राखेर नगरबासीले नगर परिक्रमासमेत गराएका छन् ।
पूजाको कप्तानीमा रहेको टीमले यूएईलाई हराउँदै आईसीसी यू–१९ महिला टी–२० विश्वकप खेलमा स्थान सुनिश्चित गरेको छ । उक्त सफलताकै कारण नेपालले सन् २०२५ को जनवरीमा मलेसियामा हुने यू–१९ महिला टी–२० विश्वकप र डिसेम्बरमा मलेसियामै हुने यू–१९ महिला एसिया कप खेल्ने भएको छ ।