कञ्चनपुरमा बडायक दम्पत्तीको हत्याको एक महिनापछि आरोपी पक्राउ, मदिरा सेवनपछि हत्या गरेको आशंका

काठमाडौं– करिब एक महिना पहिले कञ्चनपुरको लालझाडी गाउँपालिका– १, बिनबारीमा भएको दम्पत्ती हत्या प्रकरणमा संलग्न भएको आरोपमा एक जना पक्राउ परेका छन् ।

सोही स्थानका ५० वर्षीय गंगाबहादुर रानालाई प्रहरीले बुधबार नियन्त्रणमा लिएको हो । अदालतसँग १० दिन हिरासतमा राख्ने अनुमति लिएर अनुसन्धान सुरु गरिएको प्रहरीले पुष्टी गरेको छ ।

एक महिना लामो अनुसन्धानपछि रानालाई पक्राउ गर्न सफल भएको प्रहरीले जनाएको छ । गत कात्तिक ८ गते बिहान रमेश बडायक र उनकी श्रीमती कमला मृत भेटिए । रमेश घरको आँगनमा मृत भेटिएका थिए भने उनकी श्रीमती कमला बरण्डामा सुतेकै ठाउँमा मृत भेटिएकी थिइन् । रमेशको टाउको र कमलाको टाउको तथा निधारमा समेत धारिलो हतियार प्रहार गरिएको थियो । यी दम्पत्ती घरमा नै नास्ता पसल सञ्चालन गर्दै आएका थिए ।

घटनाको हालसम्म भएका अनुसन्धानले लुटपाट भन्दा पनि मदिरा सेवनपछिको विवादका कारण दम्पत्तीको हत्या भएको खुलेको प्रहरीले जनाएको छ ।