एनपीएलमा १५ खेल सकिँदा पहिलो नम्बरमा जनकपुर बोल्ट्स, जितविहीन बन्दै पुच्छारमा लुम्बिनी

काठमाडौं– जारी नेपाल प्रिमियर लिग (एनपीएल) मा हालसम्म १५ वटा खेल सकिएका छन् । मंसिर १५ गतेबाट काठमाडौंस्थित त्रिवि क्रिकेट मैदानमा सुरु भएको एनपीएलमा हालसम्म ६ वटा टिमले समान ४ खेल खेलिसकेका छन् भने पोखरा र काठमाडौं गुर्खाजले समान ३ खेल खेलेका छन् ।

हालसम्म भएका ३० खेलमा अपराजित रहेको जनकपुर बोल्ट्स शीर्ष स्थानमा छ भने जीतबिहिन रहँदै लुम्बिनी लायन्स पुच्छरमा छ । ४ खेल खेलेको जनकपुर आठ अंकसहित शीर्ष स्थानमा रहँदा लुम्बिनीले अंक जोड्न सकेको छैन ।

चार खेलमध्ये समान तीन जित र एक हार भोगेका सुदूरपश्चिम रोयल्स र चितवन राइनोज समान तीन जित र एक हारसहित क्रमश दोस्रो र तेस्रो स्थानमा रहँदा ४ मध्ये २ खेल जितेको कर्णाली याक्स चौथो स्थानमा छ । जारी एनपीएलमा हालसम्म ७ टिमका १४ जना ब्याटरले अर्धशतक हिर्काउँदा १ जनाले शतक प्रहार गरेका छन् ।

कर्णाली याक्स र चितवन राइनोजका ब्याटर समान तीन अर्धशतक बनाएका छन् । यस्तै, सुदूरपश्चिम रोयल्स, लुम्बिनी लायन्स र जनकपुर बोल्ट्सका दुई–दुई ब्याटरले अर्धशतक बनाएका छन् । पोखरा र विराटनगरका एक(एक जना ब्याटरले अर्धशतक हिर्काउँदा काठमाडौं गुर्खाजका कुनै पनि खेलाडीले अर्धशतक प्रहार गर्न सकेका छैनन् ।