काठमाडौं– त्रिभुवन अन्तर्राष्ट्रिय विमानस्थलमा एक महिनामा साढे आठ लाखभन्दा बढी यात्रु आवागमन भएको छ । यस्तै यो समयमा साढे १२ हजारभन्दा बढी उडान–अवतरण भएको छ ।
त्रिभुवन विमानस्थल नागरिक उड्डयन कार्यालयले बुधबार जारी गरेको तथ्यांक अनुसार सन् २०२४ नोभेम्बर महिनामा ८ लाख ५१ हजार २५ यात्रु आवागमन भएको हो। आन्तरिक र अन्तर्राष्ट्रिय गरेर नोभेम्बरमा १२ हजार ५ सय २५ उडान–अवतरण भएको छ ।
नोभेम्बरमा अन्तर्राष्ट्रियतर्फ ४ लाख २९ हजार ८ सय ४७ यात्रु आवागमन भएको छ । कुल २ हजार ६ सय ४८ उडान–अवतरणबाट १ लाख ९९ हजार ४ सय ९५ यात्रु आगमन भएको छ भने २ लाख २९ हजार ७ सय ६३ यात्रु बाहिरिएका छन् ।
त्यसैगरी आन्तरिकतर्फ ४ हजार ९ सय ३३ अवतरण हुँदा २ लाख १९ हजार ४ सय ३० र ४ हजार ९ सय ४४ उडानबाट २ लाख १ हजार ७ सय ४८ यात्रु बाहिरिएका छन् । कुल आन्तरिक यात्रु आवागमन संख्या ४ लाख २ हजार १ सय ७८ पुगेको छ ।
प्रतिक्रिया