काठमाडौं– पहिलो संस्करणको नेपाल प्रिमियर लिग (एनपीएल) प्रतियोगितामा सबैभन्दा उत्कृष्ट प्रदर्शन गरेको भन्दै फ्रेन्चाइज टोली सुदुरपश्चिम रोयल्सका कप्तान दिपेन्द्र सिंह ऐरीले
कार पुरस्कार पाए ।
प्रतियोगिताको फाइनल खेलमा जनकपुर बोन्ट्सले हार व्यहोरेका बाबजुत उनले खेलाडीतर्फ भने उत्कृष्टको पुरस्कार पाएका थिए । उनलाई क्यानले लिग सुरु गर्नुअघि नै घोषणा गरे अनुसारको ओमोडाको ई–५ कार पुरस्कार दिइयो ।
दिपेन्द्रले प्रतियोगिताभर ९ खेलमा १ अर्धशतकसहित २२७ रन बनाएका छन् । बलिङतर्फ उनले ९ खेलमा ९ विकेट लिएका छन् ।
उनले पुरस्कारमा पाएको गाडीमा ९९ किलोवाट मोटर तथा ६१ किलोवाट आवरको व्याट्री रहेको छ । कम्पनीका अनुसार यसले ४३० किलोमिटरको रेन्ज दिन्छ । कम्पनीको अनुसार उक्त कारको मूल्य नेपाली बजारमा ६१ लाख ९९ हजार रूपैयाँ हो । तर एनपीएलमा ऐरीले जितेको उक्त कारको मोटो रकम सरकारलाई करस्वरुप बुझाउनुपर्ने भएको छ ।
आयकर ऐनको दफा ८८ ‘क’ अनुसार दीपेन्द्रले कार पुरस्कार पाएवापत आकस्मिक लाभ कर तिर्नु पर्ने भएको हो ।
ऐनको दफा ८८’क’ को उपदफा १ मा साहित्य, संस्कृति, खेलकुद, पत्रकारिता, विज्ञान, प्रविधि तथा सार्वजनिक प्रशासन क्षेत्रमा योगदान पुर्याए बापत प्राप्त हुने राष्ट्रिय तथा अन्तरराष्ट्रियस्तरका पाँच लाख रुपैयाँसम्मको पुरस्कारमा आकस्मिक लाभ कर लाग्ने छैन भनिएको छ । यसअनुसार उनले विगतमा पाँच लाख सम्मको पुरस्कार नपाएको अवस्थामा १४ लाख २४ हजार रुपैयाँ कर तिर्नु पर्ने छ । यसअघि ५ लाख बराबरको पुरस्कार पाइसकेको भए कारको १५ लाख ५० हजार रुपैयाँ कर बुझाउनु पर्ने छ ।
आयकर ऐन अनुसार नेपाल सरकारले पुरस्कारमा लाग्ने करमा छुट भने दिन सक्छ । नेपाल सरकार मन्त्रिपरिषद्ले निर्णय गरी दिपेन्द्रले पाएको पुरस्कारमा कर छुट दिने सक्ने व्यवस्था आयकर ऐनमा छ । यदि सरकारले करमा छुट नदिएमा कर तिरेपछि मात्र दीपेन्द्रले कार आफ्नो नाममा नामसारी गर्न पाउनेछन् ।
यस्तै एनपीएलमा जनकपुर बोल्ट्सका खेलाडी ललित राजवंशीले १७ विकेट लिँदै उत्कृष्ट बलरको उपाधि जीते । उनले १० लाख मूल्यको विद्युतीय मोटरसाइकल पुरस्कार पाएका छन् । उनले पनि मोटरसाइकल नामसारी गर्ने क्रममा कर तिर्नुपर्ने भएको छ ।
यस विषयमा क्यानले एनपीएलमा पुरस्कार पाएका खेलाडीको कर छुट गर्न माग गर्दै सरकारलाई चिठी लेख्न अनुरोध गर्ने जनाएको छ ।
प्रतिक्रिया