राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रहरीले चितवन जिल्ला अदालतमा उपस्थित गराएको छ। साहारा चितवन बहुउद्देश्यीय सहकारी संस्थाको बचत रकम अपचलनको मुद्दामा थुनछेक बहसका लागि बिहीबार अदालतमा पेश गरिएको हो।
बहस बुधबारदेखि सुरू भएको थियो, तर बुधबार थुनछेक बहस नसकिएपछि अदालतले लामिछानेलाई हिरासत पठाउने आदेश दिएको थियो। लामिछाने बुधबार नै चितवन जिल्ला अदालतमा उपस्थित भएका थिए।
साहारा चितवन सहकारी संस्थाको बचत रकम अपचलनको मुद्दामा लामिछानेविरुद्ध जाहेरी दिएका पीडितको तर्फबाट बिहीबार ८ जना अधिवक्ताले बहस गर्दैछन्।
बुधबार थुनछेक बहसमा सरकारको तर्फबाट जिल्ला न्यायाधीवक्ता रवि न्यौपानेसहित सरकारी वकिलहरू बुद्धबहादुर थापा र अमृत सुवेदीले बहस गरेका थिए। त्यसपछि, जाहेरीदाताको तर्फबाट अधिवक्ता रमेश काफ्लेले बहस गरे।
बिहीबार १० बजेपछि, जाहेरीदाताको तर्फबाट वरिष्ठ अधिवक्ताहरू दिनेश त्रिपाठी, सुरेन्द्र भण्डारी, राजकुमार श्रेष्ठ, अधिवक्ताहरू आरसी गौतम, गोपिलाल देवकोटा, सीताराम दवाडी, सुनिता अधिकारी र शम्भु बर्तौलाले बहस गर्दैछन्।
लामिछानेको तर्फबाट बहस गर्न वरिष्ठ अधिवक्ताहरू सुशीलकुमार पन्त, धर्मराज आचार्य, अधिवक्ताहरू नारायणदत्त कँडेल, चुडामणि सापकोटा, रामचन्द्र देवकोटा, सुवर्ण सापकोटा, सञ्जय गोले, केदारराज पन्त र दिपकराज तिमल्सेनाले वकालत गरेका छन्। थुनछेक बहस बिहीबार नै सकिने तयारी रहेको अदालतका सूचना अधिकारी अमृत विश्वकर्माले जानकारी दिएका छन्।
प्रतिक्रिया