मस्को । रुसले सेन्ट पिटर्सबर्गस्थित जर्मनीको वाणिज्य दूतावास बन्द गर्न आदेश दिएको छ। रुसको विदेश मन्त्रालयले आगामी सेप्टेम्बर १८ सम्ममा दूतावासको काम बन्द गर्न निर्देशन दिएको हो।
गत साता जर्मनीले रुसका दुई कूटनीतिक कार्यालय बन्द गरेपछि त्यसको प्रतिशोधस्वरूप रुसले यस्तो कदम चालेको जनाएको छ।
जर्मनीले लाइपजिग विमानस्थलमा ड्रोन आक्रमणको प्रयासमा रुस संलग्न रहेको आरोप लगाउँदै रुसी कूटनीतिक कार्यालय बन्द गरेको थियो। रुसले भने उक्त आरोपको खण्डन गर्दै जर्मनीकै कदमले दुई देशबीच तनाव बढाएको बताएको छ।
रुसले वाणिज्य दूतावासका कूटनीतिज्ञ तथा कर्मचारीलाई तोकिएको समयभित्र देश छाड्नसमेत आदेश दिएको छ।
युक्रेन युद्धपछि रुस र जर्मनीबीचको सम्बन्ध लगातार तनावपूर्ण बन्दै गएको छ। जर्मनी युक्रेनको प्रमुख युरोपेली समर्थक हो भने रुसले पश्चिमी सहयोगको निरन्तर विरोध गर्दै आएको छ।
प्रतिक्रिया