पाकिस्तान । दक्षिण–पश्चिमी प्रान्त बलुचिस्तानमा पछिल्लो समय हिंसाको स्वरूप तीव्र रूपमा बदलिन थालेको छ। लामो समयसम्म तुलनात्मक रूपमा शान्त रहेका पश्तुनबहुल जिल्लाहरूमा जुनयता सशस्त्र आक्रमण बढेपछि हिंसा नयाँ क्षेत्रमा फैलिएको संकेत देखिएको छ।
पिशिन, जियारत, झोब, शेरानी र किला सैफुल्लाहलगायतका क्षेत्रमा पछिल्ला महिनामा सुरक्षा संरचना, प्रहरी टोली तथा विकास आयोजनामाथि आक्रमण भएका छन्। निगरानी संस्थाका अनुसार जनवरीदेखि मेसम्म शान्त रहेका ११ पश्तुनबहुल जिल्लामा जुनयता कम्तीमा १३ वटा सशस्त्र आक्रमण भएका छन्।
बलुचिस्तानमा बलुच राष्ट्रवादी विद्रोहीसँगै पाकिस्तान तालिबान (टीटीपी)को गतिविधि पनि बढ्दै गएको सुरक्षा विश्लेषकहरूको भनाइ छ। केही घटनामा बलुचिस्तान लिबरेसन आर्मी (बीएलए)ले जिम्मेवारी लिए पनि टीटीपी र बीएलएबीच प्रत्यक्ष सहकार्य भएको पुष्टि भने भइसकेको छैन।
हिंसाको असर सुरक्षा क्षेत्रमा मात्र सीमित छैन। इरान तथा कराँची जोड्ने प्रमुख व्यापारिक मार्गसमेत प्रभावित भएका छन्। मालवाहक ट्रकमा आक्रमण र आगजनीको जोखिम बढेपछि चालकहरू जोखिमपूर्ण मार्गमा जान डराइरहेका छन्, जसले स्थानीय व्यापार र अर्थतन्त्रमा थप दबाब सिर्जना गरेको छ।
विश्लेषकहरूले राजनीतिक असन्तुष्टि, आर्थिक समस्या, सीमा क्षेत्रमा बढ्दो प्रतिबन्ध र सशस्त्र समूहको विस्तारले बलुचिस्तानको संकट थप जटिल बनाइरहेको बताएका छन्। पश्तुनबहुल क्षेत्रमा हिंसा निरन्तर फैलिँदै गए पाकिस्तानका लागि बलुचिस्तान नयाँ सुरक्षा संकटको केन्द्र बन्न सक्ने चेतावनी दिइएको छ।
प्रतिक्रिया