काठमाडौँ । नेपाली कम्युनिष्ट पार्टी (नेकपा)का संसदीय दलका उपनेता प्रमेशकुमार हमालले सदनमा उठाइएका जनसरोकारका विषयप्रति सरकार गम्भीर नभएको बताएका छन्।
प्रतिनिधिसभाको आजको बैठकमा समय लिएर बोल्दै उपनेता हमालले संसद्मा उठाइएका विषय, सरकारका कामकारबाही तथा जनताका समस्याप्रति सरकारले अपेक्षित गम्भीरता नदेखाएको बताएका हुन्।
उनले गत अधिवेशन अन्त्य भएपछि सरकारले अध्यादेश ल्याएको तथा चालु अधिवेशनमा सभामुखको निर्देशनसमेत पालना नभएको आरोप लगाए। प्रधानमन्त्री संसद्प्रति जवाफदेही हुनुपर्नेमा त्यसअनुसारको व्यवहार हुन नसकेको उनको भनाइ थियो।
उपनेता हमालले सरकारका घोषणा, प्रतिबद्धता, कार्यक्रम तथा बजेटको प्रभावकारिताबारे संसद्मा नियमित समीक्षा हुनुपर्नेमा जोड दिए। लोकतान्त्रिक शासन प्रणालीमा विधि र प्रक्रियाको पालना अपरिहार्य रहेको उल्लेख गर्दै उनले सरकार त्यसतर्फ गम्भीर बन्नुपर्ने बताए।
उनले सरकारका नीति तथा कार्यक्रम र बजेटमा उल्लेख गरिएका प्रतिबद्धता व्यवहारमा कति कार्यान्वयन भए भन्ने विषयमा पनि संसद्मा छलफल र समीक्षा आवश्यक रहेको बताए।
सेवा प्रवाहमा सरकारले गरेका प्रतिबद्धता पूरा गर्न नसकेको आरोप लगाउँदै हमालले जनजीविकासँग प्रत्यक्ष जोडिएका विषयमा समेत अपेक्षाअनुसार काम हुन नसकेको बताए।
सुशासन कायम गर्ने विषयमा सरकारको प्रतिबद्धता व्यवहारमा देखिनुपर्ने उल्लेख गर्दै उनले जनताका दैनिक समस्या समाधान, सार्वजनिक सेवा प्रभावकारी बनाउने र सरकारलाई संसद्प्रति उत्तरदायी बनाउने विषयमा थप ध्यान दिनुपर्ने बताए।
संसद्मा उठाइएका प्रश्न र जनसरोकारका विषयलाई सरकारले गम्भीरतापूर्वक लिएर आवश्यक जवाफ तथा कार्यान्वयनमार्फत सम्बोधन गर्नुपर्नेमा उनको जोड थियो।
प्रतिक्रिया