काठमाडौँ । सम्पत्ति शुद्धीकरण अनुसन्धान विभागले पूर्वप्रधानन्यायाधीश चोलेन्द्रशमशेर जबराको निवासमा छापा मारेको छ ।
विभागको टोली जबराको काठमाडौँस्थित निवासमा पुगेर विभिन्न विषयमा अनुसन्धान तथा आवश्यक कागजातको खोजी गरेको बताइएको छ । छापाका क्रममा के–कस्ता कागजात तथा सामग्री बरामद भए भन्ने विषयमा भने विस्तृत विवरण सार्वजनिक भइसकेको छैन ।
पूर्वप्रधानन्यायाधीश जबरा पछिल्लो समय विभिन्न विवाद र अनुसन्धानसँग जोडिँदै आएका छन् । यसअघि उनलाई प्रहरीले महाराजगञ्जस्थित निवासबाट नियन्त्रणमा लिएको थियो । प्रहरीले त्यसबेला जबरालाई सुरक्षा चुनौती देखिएपछि सुरक्षित स्थानमा लैजाने बताएको थियो भने घटनाको विषयमा विभिन्न प्रश्नसमेत उठेका थिए।
जबराविरुद्ध यसअघि संसद्मा महाभियोग प्रस्तावसमेत दर्ता भएको थियो । उक्त प्रस्ताव लामो समय निष्क्रिय रहेपछि त्यससँग सम्बन्धित विषयमा सर्वोच्च अदालतमा समेत विवाद पुगेको थियो।
सम्पत्ति शुद्धीकरण विभागको पछिल्लो छापा कुन विषयसँग सम्बन्धित हो र अनुसन्धानको दायरा कहाँसम्म पुगेको छ भन्नेबारे विभागबाट थप विवरण आउन बाँकी छ ।
प्रतिक्रिया