काठमाडौं । वैदेशिक रोजगारीमा मलेसिया जाने नेपाली श्रमिकको स्वास्थ्य परीक्षणमा सिन्डिकेट खडा गरी ठगी गरेको आरोप लागेका मेडिकल व्यवसायी कैलाश खड्कालाई प्रहरीले पक्राउ गरेको छ । उनलाई काठमाडौंमा नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरेको बताइएको छ ।
खड्कामाथि मलेसिया जाने नेपाली कामदारलाई स्वास्थ्य परीक्षणका नाममा सिन्डिकेटमार्फत सेवा लिन बाध्य पारेको र ठूलो रकम असुलेको आरोप छ । प्रहरी स्रोतका अनुसार प्रधानमन्त्रीको निर्देशनपछि उनीमाथि अनुसन्धान अघि बढाइएको हो । यद्यपि, उनीमाथि लागेका आरोपबारे अनुसन्धानको निष्कर्ष आइसकेको छैन ।
खड्का यसअघि पनि वैदेशिक रोजगारीमा जाने श्रमिकसँग रकम असुलेको आरोपका कारण विवादमा तानिएका थिए । बायोमेट्रिक, भिएलएन, वान स्टप सेन्टर र जिएसजीजस्ता संयन्त्रमाथि तत्कालीन सरकारले कारबाही प्रक्रिया अघि बढाउँदा उनको नामसमेत चर्चामा आएको थियो ।
२०७७ असारमा खड्का वैदेशिक रोजगार बोर्डको विज्ञ सदस्यमा नियुक्त भएका थिए । वैदेशिक रोजगारीमा जाने श्रमिकको स्वास्थ्य परीक्षणमा सिन्डिकेट खडा गरेको आरोप लागिरहेका बेला उनलाई बोर्ड सदस्य बनाइएको भन्दै आलोचना भएको थियो । चौतर्फी विरोधपछि उनले २०७७ साउन १ गते पदबाट राजीनामा दिएका थिए ।
तत्कालीन नेकपा सरकारको समयमा भएको उनको नियुक्तिलाई लिएर राजनीतिक पहुँच र स्वार्थको विषयसमेत उठेको थियो । त्यसबेला केपी शर्मा ओली प्रधानमन्त्री थिए भने श्रम, रोजगार तथा सामाजिक सुरक्षामन्त्री रामेश्वर राय यादव थिए । खड्काको नियुक्ति तत्कालीन राजनीतिक शक्ति समीकरणसँग जोडेर चर्चा गरिएको थियो ।
यसअघि श्रमिकको स्वास्थ्य परीक्षणमा सिन्डिकेटको आरोप र त्यससँग जोडिएका विभिन्न व्यावसायिक संयन्त्रमाथिको विवादले वैदेशिक रोजगारीमा जाने नेपाली कामदारको लागत र सेवा प्रवाहबारे प्रश्न उठाएको थियो । श्रमिकको स्वास्थ्य परीक्षण पारदर्शी, प्रतिस्पर्धात्मक र सहज हुनुपर्ने माग यसअघि पनि उठ्दै आएको छ ।
खड्काको पक्राउसँगै उनीमाथि लागेका आरोप, स्वास्थ्य परीक्षणसम्बन्धी कारोबार र त्यसमा संलग्न हुन सक्ने अन्य व्यक्ति वा संस्थाबारे अनुसन्धान हुने अपेक्षा गरिएको छ । यद्यपि, पक्राउ पर्नु मात्रै दोष प्रमाणित हुनु होइन । घटनाको वास्तविकता अनुसन्धान र कानुनी प्रक्रियाबाट टुंगिनेछ ।
प्रतिक्रिया