काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत आजको पहिलो खेलमा विराटनगर किंग्स र चितवन राइनोज आमनेसामने हुँदैछन्। कीर्तिपुरस्थित त्रिवि क्रिकेट मैदानमा हुने खेलमा विराटनगरका कप्तान सन्दीप लामिछानेले टस जितेर पहिले बलिङ गर्ने निर्णय गरेका छन्।

गत संस्करणमा चितवनसँग ४८ रनले पराजित भएको विराटनगर यसपटक जित निकाल्ने लक्ष्यसहित मैदानमा उत्रिएको छ। अघिल्लो सिजनको भेटमा चितवनले विराटनगरको अपराजित यात्रामा पूर्णविराम लगाएको थियो।

अघिल्लो वर्ष के भएको थियो ?

एनपीएलको दोस्रो संस्करणमा २०८२ मंसिर १० गते अर्थात् २६ नोभेम्बर २०२५ मा विराटनगर र चितवनबीच प्रतिस्पर्धा भएको थियो। उक्त खेलमा पनि टस जितेको विराटनगरले पहिले बलिङ गर्ने निर्णय गरेको थियो।

पहिले ब्याटिङ गरेको चितवन राइनोजले निर्धारित २० ओभरमा ५ विकेट गुमाउँदै १७४ रन बनाएको थियो। चितवनका लागि इंग्लिस खेलाडी रवि बोपाराले ३८ बलमा ६५ रनको आक्रामक इनिङ्स खेलेका थिए। उनले ३ चौका र ४ छक्का प्रहार गरेका थिए।

त्यस्तै, सैफ जैबले ३२, देव खनालले २८ र कप्तान कुशल मल्लले अविजित २० रन बनाएका थिए। चितवनले निर्धारित ओभरमा बलियो योगफल तयार गरेको थियो।

विराटनगरको ब्याटिङ धराशायी

१७५ रनको लक्ष्य पछ्याएको विराटनगर किंग्सले अपेक्षाअनुसार प्रदर्शन गर्न सकेन। टोली १६.५ ओभरमा १२६ रनमै अलआउट भयो।

विराटनगरका लागि मार्चेन्ट डे लाङले २२ बलमा ३९ रन बनाए। प्रतिश जिसीले १२ बलमा ३० रन तथा साम हिजलेटले ११ बलमा २२ रनको योगदान दिए। तर अन्य ब्याटरले ठूलो साझेदारी गर्न नसक्दा विराटनगर ४८ रनले पराजित भयो।

रञ्जित कुमारको घातक बलिङ

चितवनको जितमा बलर रञ्जित कुमार नायक बने। उनले ४ ओभरमा २१ रन खर्चेर ५ विकेट लिए। एनपीएलको उक्त सिजनमा पाँच विकेट लिने उनी पहिलो बलर बनेका थिए।

कमलसिंह ऐरीले २ विकेट लिए भने चितवनका अन्य बलरले पनि विराटनगरलाई दबाबमा राखेका थिए। रञ्जितको उत्कृष्ट बलिङका कारण विराटनगरले नियमित अन्तरालमा विकेट गुमायो र लक्ष्यसम्म पुग्न सकेन।

आज विराटनगरलाई जितको चुनौती

अघिल्लो सिजनको हारको अनुभव बोकेको विराटनगरका लागि आजको खेल महत्त्वपूर्ण छ। अर्कोतर्फ, चितवन पनि पुरानो सफलतालाई निरन्तरता दिने प्रयासमा हुनेछ।

एनपीएलको तेस्रो संस्करणको पहिलो खेलमा साबिक विजेता लुम्बिनी लायन्सले सुदूरपश्चिम रोयल्सलाई पराजित गरिसकेको छ। आजै हुने अर्को खेलमा कर्णाली याक्स र जनकपुर बोल्ट्सबीच प्रतिस्पर्धा हुनेछ।

अघिल्लो भेटमा ४८ रनको जित निकालेको चितवनले आफ्नो दबदबा कायम राख्ला वा विराटनगरले यसपटक पुरानो हारको बदला लेलान्? यसको जवाफ आजको खेलले दिनेछ।