मोरङ । मोरङको कानेपोखरी गाउँपालिका–७, बरगाछीमा आवश्यक अनुमति नलिई स्वास्थ्य शिविर सञ्चालन गरेको आरोपमा १० जना विदेशी नागरिकको राहदानी जफत गरिएको छ । विदेशी नागरिक अनुगमन जिल्ला समितिको निर्णयअनुसार उनीहरूको राहदानी आवश्यक कारबाहीका लागि अध्यागमन विभाग पठाइएको हो ।
पर्यटक भिसामा नेपाल आएका विदेशी चिकित्सकसहितको टोलीले ‘मर्सी डेभलपमेन्ट’ नामक संस्थामार्फत स्वास्थ्य शिविर सञ्चालन गरेको पाइएको जनाइएको छ । उक्त संस्थामाथि क्रिश्चियन धार्मिक गतिविधिमा संलग्न रहेको आरोपसमेत लागेको छ । सम्बन्धित निकायले आवश्यक अनुमति नलिई स्वास्थ्य शिविर सञ्चालन गरिएको विषयमा थप कारबाही प्रक्रिया अघि बढाएको छ ।
गत कात्तिक ८ गतेदेखि चार दिनसम्म सञ्चालन गर्ने गरी सुरु गरिएको शिविरमा १० जना विदेशी नागरिक सहभागी थिए । शिविरको तयारी पास्टर पावेल दङ्गालले गरेको बताइएको छ ।
स्थानीयस्तरमा अस्पताल निर्माण गर्ने उद्देश्यले प्रयोग गरिने भनिएको जग्गामा यसअघि पास्टर बाङ्देलले क्रिश्चियन धार्मिक कक्षा सञ्चालन गर्दै आएको जनाइएको छ । कानेपोखरी–७, बरगाछीका किराना व्यवसायी नवराज श्रेष्ठले अस्पताल निर्माण गर्ने उद्देश्यले तीन कट्ठा जग्गामा छवटा साना–ठूला भवन बनाएका थिए । ती भवन अहिले धार्मिक गतिविधि तथा अन्य कार्यक्रमका लागि प्रयोग हुँदै आएको बताइएको छ ।
उक्त स्थानमा धार्मिक गतिविधि सञ्चालन भइरहेको विषयलाई लिएर विवाद उत्पन्न भएपछि स्थानीयलाई खुसी पार्ने उद्देश्यले श्रेष्ठले स्वास्थ्य शिविर आयोजना गरेको बताइएको छ । हाल उक्त स्थानमा दुई जना पास्टर र केही सिलाइकटाइ प्रशिक्षक बस्दै आएको विवरणमा उल्लेख छ ।
शिविरमा सहभागी विदेशी नागरिकमध्ये तीन जना ब्राजिल, दुई जना क्यानडा र पाँच जना अमेरिकाका रहेको जनाइएको छ । उनीहरू सन् २०२६ अक्टोबर २२ र २३ मा नेपाल प्रवेश गरेका थिए । उपलब्ध विवरणअनुसार उनीहरूको भिसाको म्याद नोभेम्बर ६ देखि २१ सम्म रहेको छ ।
आवश्यक अनुमति नलिई पर्यटक भिसामा स्वास्थ्य शिविर सञ्चालन गरिएको विषयमा सम्बन्धित निकायले अनुसन्धान तथा कारबाही प्रक्रिया अघि बढाएको छ ।
प्रतिक्रिया