काठमाडौं । अमेरिकी पूर्वराष्ट्रपति बाराक ओबामाले मध्यावधि निर्वाचनमा डेमोक्र्याटिक पार्टीको सफलताले अमेरिकी जनता विभाजन नभई एकता चाहन्छन् भन्ने पुष्टि गरेको बताएका छन्।
डेमोक्र्याटिक पार्टीले सिनेट र हाउस अफ रिप्रेजेन्टेटिभमा सफलता हासिल गरेपछि सामाजिक सञ्जालमार्फत प्रतिक्रिया दिँदै ओबामाले अमेरिकी जनताले एकताको पक्षमा स्पष्ट सन्देश दिएको बताएका हुन्।
उनका अनुसार अमेरिकी जनताले विभाजन सिर्जना गर्नेभन्दा सबैलाई एकताबद्ध गर्न सक्ने र नागरिकले सामना गरिरहेका चुनौतीको ठोस समाधान प्रस्तुत गर्ने नेतृत्व चाहेका छन्।
‘यो नतिजा तब मात्र सम्भव भयो, जब देशका हरेक क्षेत्रमा—पहिले जित्ने सम्भावना निकै कम मानिएका ठाउँमा समेत—उत्कृष्ट उम्मेदवारहरू अघि सरे। उनीहरू फरक पृष्ठभूमि र राजनीतिक दृष्टिकोणका भए पनि साझा मूल्यमान्यता, जनसेवाप्रतिको विश्वास तथा आफ्ना निर्वाचन क्षेत्र र राज्यका जनतालाई प्राथमिकतामा राख्ने प्रतिबद्धताका साथ एकजुट भए,’ ओबामाले भनेका छन्।
उनले वर्तमान प्रशासनको कार्यकाल अझै दुई वर्ष बाँकी रहेको उल्लेख गर्दै अब आफ्नो जिम्मेवारी उपलब्ध अधिकारको प्रयोग गरेर आवश्यक परिवर्तन ल्याउनु, थप क्षति हुनबाट रोक्नु र भविष्यका लागि बलियो आधार तयार गर्नु रहेको बताएका छन्।
मंगलबार सम्पन्न मध्यावधि निर्वाचनमा डेमोक्र्याटिक पार्टीले सिनेटमा ५६ र हाउस अफ रिप्रेजेन्टेटिभमा २६० सिट जित्ने प्रक्षेपण गरिएको छ। सिनेटमा भने डेमोक्र्याटिक पार्टीले हालसम्म ५१ सिट जितिसकेको जनाइएको छ।
प्रतिक्रिया