जनकपुरधाम । मिथिलाञ्चलको धार्मिक आस्था, सांस्कृतिक परम्परा र सामाजिक सद्भावको प्रतीकका रूपमा रहेको छठ पर्वमा सहभागी हुन राष्ट्रिय स्वतन्त्र पार्टी (रास्वपा) का सभापति रवि लामिछाने आज जनकपुरधाम आउँदैछन्। पत्नी निकिता पौडेलसहित जनकपुरधाम आउन लागेका लामिछानेले तीन दिन यहाँ बिताउने कार्यक्रम रहेको छ।
रास्वपा मधेस प्रदेश कार्यालयले सार्वजनिक गरेको भ्रमण तालिकाअनुसार लामिछानेको जनकपुर बसाइ धार्मिक गतिविधि, सांस्कृतिक अवलोकन तथा पार्टीका नेता–कार्यकर्तासँगको भेटघाटमा केन्द्रित रहनेछ। भ्रमणका क्रममा उनले छठ पर्वको पूजाआराधनामा सहभागी हुनुका साथै जनकपुरधामका ऐतिहासिक तथा धार्मिक स्थलहरूको दर्शन गर्नेछन्।
कार्यक्रमअनुसार शनिबार दिउँसो जनकपुरधाम आइपुग्ने लामिछानेले जनकपुरधाम उद्योग वाणिज्य संघको सभाहलमा आयोजना हुने शुभकामना आदानप्रदान तथा सम्बोधन कार्यक्रममा सहभागिता जनाउनेछन्। त्यसपछि दिउँसो २ बजेदेखि ४ बजेसम्म रास्वपाका मधेस प्रदेशअन्तर्गतका नेता, कार्यकर्ता तथा पार्टी सदस्यहरूसँग सामूहिक भेटघाट र अन्तरक्रिया गर्ने कार्यक्रम तय गरिएको छ।
शनिबार साँझ उनी छठ पर्वको पूजा तथा धार्मिक अनुष्ठानमा सहभागी हुनेछन्। मिथिलाञ्चलको प्रमुख धार्मिक तथा सांस्कृतिक पर्वका रूपमा रहेको छठमा उनको सहभागितालाई पार्टीले मधेसको धार्मिक र सांस्कृतिक परम्परासँग जोडिने अवसरका रूपमा लिएको देखिन्छ।
भ्रमणको दोस्रो दिन आइतबार लामिछाने जनकपुरधामका प्रमुख धार्मिक तथा ऐतिहासिक स्थलहरूको दर्शनमा निस्कनेछन्। बिहान ७ बजेदेखि दिउँसो २ बजेसम्म जानकी मन्दिर, जनक मन्दिर, राममन्दिर, राजदेवी मन्दिर र भूतनाथ मन्दिरलगायतका धार्मिक स्थलहरूको भ्रमण गर्ने कार्यतालिका रहेको छ।
त्यसपछि आइतबार दिउँसो ३ बजे ऐतिहासिक गंगासागरमा आयोजना हुने छठ पर्वको पूजाअर्चना तथा धार्मिक अनुष्ठानमा उनी सहभागी हुनेछन्। छठ पर्वका अवसरमा गंगासागरमा हजारौँ श्रद्धालु भक्तजनको उपस्थिति रहने गर्छ। अस्ताउँदो सूर्यलाई अर्घ्य अर्पण गर्ने धार्मिक परम्परासँग जोडिएको यस पर्वमा लामिछानेको सहभागितालाई विशेष चासोका साथ हेरिएको छ।
जनकपुरधामको तीनदिने भ्रमणको अन्तिम दिन सोमबार बिहान ५ बजे छठ घाटमा हुने पूजा–आराधना तथा अर्घ्य अर्पण कार्यक्रममा लामिछाने सहभागी हुनेछन्। धार्मिक कार्यक्रम सम्पन्न गरेपछि उनी जनकपुर विमानस्थलबाट प्रस्थान गर्ने कार्यक्रम रहेको रास्वपा मधेस प्रदेश कार्यालयले जनाएको छ।
रास्वपा मधेस प्रदेशका महामन्त्री मनिषकुमार साहद्वारा जारी सूचनामा सभापतिको भ्रमणलाई व्यवस्थित र सफल बनाउन प्रदेशअन्तर्गतका सम्पूर्ण तहका पदाधिकारी, सांसद, पार्टी सदस्य तथा शुभेच्छुकहरूलाई आवश्यक समन्वय र उपस्थितिका लागि आग्रह गरिएको छ।
छठ पर्व मिथिलाञ्चलको धार्मिक आस्था, प्रकृतिप्रतिको सम्मान, सामाजिक सद्भाव र सांस्कृतिक एकताको महत्वपूर्ण प्रतीक हो। यस पर्वमा सहभागी हुन जनकपुरधाम आउन लागेका लामिछानेको भ्रमण धार्मिक गतिविधिमा मात्र सीमित नभई मधेस प्रदेशका पार्टी नेता तथा कार्यकर्तासँगको सम्बन्ध विस्तार र स्थानीय तहमा राजनीतिक संवादको अवसरसमेत बन्ने देखिएको छ।
तीन दिनसम्म जनकपुरधाममा रहने लामिछानेको भ्रमणलाई रास्वपाले धार्मिक तथा सांस्कृतिक सम्बन्ध सुदृढ गर्ने अवसरका रूपमा अघि सारेको छ।
प्रतिक्रिया