काठमाडौँ । एसिसी पुरुष एसिया कप राइजिङ स्टार्स प्रतियोगितामा सहभागी हुन नेपाली राष्ट्रिय क्रिकेट टोली मंगलबार कतार प्रस्थान गरेको छ । सन्दीप लामिछानेको कप्तानीमा रहेको १५ सदस्यीय टोलीलाई नेपाल क्रिकेट सङ्घ (क्यान)का अध्यक्ष चतुरबहादुर चन्दले बिदाइ गरेका हुन् ।
कतारमा नोभेम्बर १९ देखि सुरु हुने प्रतियोगितामा नेपालले एसियाका बलिया टोलीहरूसँग प्रतिस्पर्धा गर्नेछ । प्रतियोगिताका लागि क्यानले केही दिनअघि नै सन्दीपको कप्तानीमा १५ सदस्यीय टोली घोषणा गरेको थियो ।
नेपाली टोलीमा कप्तान सन्दीप लामिछानेसहित लोकेश बम, बसिर अहमद, अर्जुन कुमाल, नन्दन यादव, पवन सर्राफ, ललित राजवंशी, कुशल भुर्तेल, सोमपाल कामी, दीपक डुम्रे, सन्दीप जोरा, अभिषेक गौतम, ईशान पाण्डे, राशिद खान र देव खनाल रहेका छन् ।
नेपालले प्रतियोगिताको समूह चरणमा कठिन चुनौती सामना गर्नुपर्नेछ । समूह चरणअन्तर्गत नेपालले नोभेम्बर २० मा भारत ‘ए’सँग पहिलो खेल खेल्नेछ । त्यसपछि नोभेम्बर २२ मा संयुक्त अरब इमिरेट्स (युएई) र नोभेम्बर २४ मा पाकिस्तान ‘ए’सँग प्रतिस्पर्धा गर्ने तालिका छ ।
भारत ‘ए’ र पाकिस्तान ‘ए’ जस्ता टोलीसँगको प्रतिस्पर्धालाई नेपाली खेलाडीका लागि आफ्नो क्षमता प्रदर्शन गर्ने महत्त्वपूर्ण अवसरका रूपमा हेरिएको छ ।
प्रतियोगितामा राम्रो प्रदर्शन गर्दै एसियाली क्रिकेटमा आफ्नो उपस्थिति बलियो बनाउने लक्ष्यसहित नेपाली टोली कतार पुगेको छ । अब नेपाली समर्थकको ध्यान नोभेम्बर २० मा हुने भारत ‘ए’विरुद्धको पहिलो खेलमा केन्द्रित हुनेछ ।

















प्रतिक्रिया