रुकुममा भाइले दाजुको हत्यापछि गाडेको अवस्थामा शव फेला !

रुकुम पश्चिममा टाउको छुट्टिएको, गाडेको अवस्थामा एक व्यक्तिको शव फेला परेको छ।जिल्लाको चौरजहारी नगरपालिका वडा नम्वर ९ गुर्ताल निवासी ४५ वर्षीय हरिबहादुर मल्लको शव बिहीबार बिहान घर नजिकै मकै बारीमा गाडेको अवस्थामा प्रहरीले फेला पारेको हो।

जिल्ला प्रहरी प्रवक्ता, प्रहरी निरीक्षक कविराम रोकायाकाअनुसार मृतकका भाइ ३५ वर्षीय भुपेन्द्र मल्ललाई जाजरकोटबाट पक्राउ गरिएको छ।

इलाका प्रहरी कार्यालय चौरजहारीका प्रमुख प्रहरी निरीक्षक धर्मसिंह विष्टका अनुसार भुपेन्द्रले प्रहरी समक्ष हत्या आफैंले गरेको स्वीकारेका छन्। हरिबहादुर सुतेको समयमा उनका भाइ भुपेन्द्रले ग्रासी (माछामासु काट्न प्रयोग गरिने हतियार) घाँटी छिनाली हत्या गरेको प्रहरी समक्ष बयान दिएको बिष्टले बताए।

प्रहरीले अभियुक्त भूपेन्द्रलाई बुधबार राति जाजरकोट जिल्लास्थित आफन्त नाता पर्ने दिदीको घरबाट पक्राउ गरेर ल्याएको विष्टले जानकारी दिए। हरिबहादुरको ४ दिन अगाडि हत्या भएको देखिन आएको प्रहरीले बताएको छ। दाजुको हत्या पछि घटना लुकाउने उद्देश्यले भुपेन्द्रले आफैले घर नजिकै मकै बारीमा खाडल खनेर गाडेको बिष्टले जानकारी दिए।

घरमा दाजुभाइ मात्रै बस्थे

घरमा दाजुभाइ मात्रै बस्दै आएका थिए। उनीहरुकी एक ७० वर्षीया आमा छोरीको घरमा बस्दै आएकी छन्। उनी छोरीको घरमा बस्नुको मुख्य कारण कान्छो छोरा भुपेन्द्रकै त्रासले गर्दा खुल्न आएको प्रहरीले बताएको छ।

अनुसन्धानमा खटिएका प्रहरी निरीक्षक बिष्टका अनुसार हरिबहादुर र उनकी पत्नीबीचको सम्बन्ध बिग्रिएका कारण १५÷१६ वर्ष अगाडिदेखि उनी सल्यानस्थित माइतीमा छोरीसहित बस्दै आएकी छन्। भुपेन्द्रको भने बिहे भएको छैन।