मुद्दा फिर्ता प्रक्रिया सकिएसँगै हलमा लाग्यो ‘एक्टर–टेक १’

फिल्म ‘एक्टर–टेक १’ अब विना रोकावट हलमा लागेको छ । आज जिल्ला अदालत काठमाडौंले मुद्दा फिर्ता प्रक्रिया पुरा भएको जानकारी दिएसँगै प्रदर्शकहरुले यो फिल्मलाई धमाधम शोज दिइरहेका छन् । आजको भन्दा भोलिका लागि अझै बढी शोज दिइएको छ ।

‘एक्टर’ फिल्मका निर्माताले दिएको उजुरीका आधारमा यो फिल्मको बुधबारको रिलिज रोकिएको थियो । तर, बिहिबार दुवै पक्षबिच सहमती भएको थियो । सोही सहमतीको पत्र आज अदालतमा पेश गरेपछि मुद्दा फिर्ता भएको हो ।

मुद्दा फिर्ता प्रक्रिया पुरा नभएसम्म रिलिज नगर्ने अडान प्रदर्शकहरुले लिएका थिए । सोही कारण बिहानीको शोजमा फिल्म रिलिज हुन सकेन ।

फिल्म हलमा लागेपछि नायक प्रदिप खड्का र राजवल्लभ कोइरालाले दर्शकहरुसँग फिल्म हेरिदिनका लागि अपिल गरेका छन् । राजन भुषालको निर्देशनमा तयार भएको यो फिल्मलाई थमन कुमार भण्डारी र मोती कार्कीले बनाएका हुन् ।

फिल्ममा प्रदिप खड्का, आना शर्मा, राजवल्लभ कोइराला, दिव्या रामायझी लगायतका कलाकारहरुको अभिनय छ ।