नेकपा (माओवादी केन्द्र) का नेता एवं प्रतिनिधि सभा सदस्य अमनलाल मोदीले सरकारले नेपाल विद्युत प्राधिकरणका कार्यकारी निर्देशक (एमडी) कुलमान घिसिङलाई बर्खास्त गर्न लागेको भन्दै आपत्ति जनाएका छन् । आज (आइतबार) प्रतिनिधि सभाको बैठकलाई सम्बोधन गर्दै उनले सरकारले राम्रो काम गर्न नसकेको र राम्रो काम गर्नेलाई पनि हटाउने प्रयत्न गरिरहेको बताएका हुन् । उनले सरकारको यस्तो कदमविरुद्ध आफ्नो पार्टी माओवादी केन्द्र प्रतिरोधमा उत्रिने पनि चेतावनी दिए ।
‘नेपाल विद्युत प्राधिकरणका एमडीको कारणले आज देश लोडसेडिङमुक्त भएको छ । तर, सरकार उहाँलाई स्पष्टीकरण सोधेर बर्खास्तको तयारी गरिराखेको छ । तसर्थ म भन्न चाहन्छु सरकारलाई– आज यो देशमा जसले राम्रो काम गरिराखेको छ, जसले जनताको पक्षमा काम गरिराखेको छ, सरकारले राम्रो काम त गर्न सकेन, सकेन । राम्रो काम गर्ने मान्छेलाई हटाइराखेको छ, बर्खास्त गरिराखेको छ । प्रमुख प्रतिपक्षी दल माओवादी केन्द्र त्यस्तो गलत कामको प्रतिरोध गर्छ,’– सांसद मोदीले भने ।
प्रतिक्रिया