रारा घुम्न आएका पर्यटकको लेक लागेर मृत्यु

काठमाडौँ – नेपालको प्रमुख पर्यटकीय स्थल रारा ताल घुम्न आएका एक आन्तरिक पर्यटकको मृत्यु भएको छ। काभ्रेको धुलिखेल नगरपालिका–१० स्थायी ठेगाना भएका ५४ वर्षीय भुवन विश्वकर्मा आज बिहान लेक लागेर मृत्यु भएको प्रमुख जिल्ला अधिकारी कमलप्रसाद पाण्डेले जानकारी दिएका छन्।

जिल्ला अस्पताल मुगुका चिकित्सक नकुल शाहीका अनुसार, विश्वकर्मा आइतबार राति ९ बजे श्वास फेर्न समस्या भएपछि चेकजाँच गर्न अस्पताल पुगेका थिए। चेकजाँचमा उनको शरीरमा अक्सिजनको कमी देखिएको थियो, र चिकित्सकले उनलाई थप उपचारको लागि अस्पतालमा भर्ना हुन सुझाव दिएका थिए। तर, विश्वकर्माले अस्पतालको सल्लाह नलिंदै सल्लेरी फर्किएका थिए। सोमबार बिहान ६ बजेतिर उनलाई साथीहरूले एम्बुलेन्समा अस्पताल पुर्याए, जहाँ उनको मृत्यु भइसकेको थियो।

चिकित्सक शाहीका अनुसार, विश्वकर्मामा मोटोपन र दमको दीर्घरोग थियो। चिसो मौसम, हिमपात र उच्च हिमाली भूभागमा अक्सिजनको कमीका कारण लेक लागेर कार्डियाक अरेस्टको कारण उनको मृत्यु भएको हो।

आइतबार मात्रै, मृतक विश्वकर्मासहित २५ जनाको टोली रारा ताल क्षेत्र घुम्न पुगेको थियो।