राप्रपामा ठूलो झट्का : धवलशम्सेर राणासहित १८३ नेताको सामूहिक राजीनामा

काठमाडौं l राष्ट्रिय प्रजातन्त्र पार्टी (राप्रपा) फेरि एकपटक गम्भीर आन्तरिक संकटमा परेको छ। पार्टीका महामन्त्री धवलशम्सेर राणा सहित १८३ जना प्रभावशाली नेताहरूले बिहीबार काठमाडौंमा आयोजित एक विशेष कार्यक्रममार्फत सामूहिक रूपमा पार्टी परित्याग गरेका छन्।

नेताहरूको सामूहिक बहिर्गमनसँगै राप्रपाभित्र लामो समयदेखि देखिँदै आएको आन्तरिक विवाद र असन्तुष्टि सतहमा आएको छ। यस घटनाले पार्टी नेतृत्व, संगठन सञ्चालन तथा भावी राजनीतिक दिशाबारे गम्भीर प्रश्नहरू उठाएको छ।

राजावादी तथा हिन्दुराष्ट्रको एजेन्डा बोकेको राप्रपाका लागि यो घटनालाई ठूलो राजनीतिक धक्का मानिएको छ। पार्टीका प्रभावशाली नेताहरू एकैपटक बाहिरिएपछि संगठनात्मक संरचना, जनाधार तथा आगामी राजनीतिक रणनीतिमा समेत असर पर्ने विश्लेषण गरिएको छ।

यस घटनाले राप्रपाभित्रको शक्ति सन्तुलनमा परिवर्तन ल्याउने मात्र नभई नेपालका दक्षिणपन्थी तथा राजावादी राजनीतिक शक्तिहरूको भविष्यबारे पनि नयाँ बहस सुरु गराएको छ। पार्टी परित्याग गरेका नेताहरूको आगामी राजनीतिक यात्रा र उनीहरू कुन शक्तिसँग आबद्ध हुन्छन् भन्ने विषयलाई पनि राजनीतिक वृत्तले चासोका साथ हेरिरहेको छ।