यात्रु तानातान र झोला खोस्ने आरोपमा १० जना पक्राउ

काठमाडौँ उपत्यकाबाट बाहिरिने यात्रुलाई अनावश्यक दुःख तथा हैरानी दिएको आरोपमा ट्राफिक प्रहरीले १० जनालाई पक्राउ गरेको छ।

काठमाडौँ उपत्यका ट्राफिक प्रहरी कार्यालयबाट खटिएको टोलीले कोटेश्वर र जडिबुटी क्षेत्रमा सञ्चालन भइरहेका बस काउन्टरमा अनुगमन गर्दा यात्रु तानातान गर्ने, झोला खोस्ने तथा अमर्यादित व्यवहार गर्ने कर्मचारी, चालक र सहचालकलाई नियन्त्रणमा लिएको हो।

पक्राउ पर्नेमा सूर्यबहादुर देवकोटा, प्रकाश शिवाकोटी, हरिभजन थापा, डिल्लीप्रसाद लामिछाने, सुरेश तामाङ, तिलककुमार थापा, खड्कबहादुर तामाङ, डोरकुमार श्रेष्ठ, नन्दलाल बुढाथोकी र राजेश सापकोटा रहेका छन्।

काठमाडौँ उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार यात्रुमाथि हैरानीपूर्ण व्यवहार गरिरहेको भेटिएपछि उनीहरूलाई पक्राउ गरिएको हो।

पक्राउ परेका सबैलाई थप अनुसन्धान र कानुनी कारबाहीका लागि जिल्ला प्रहरी परिसर काठमाडौं पठाइएको प्रहरीले जनाएको छ।